1991թ. Սպիտակի Մեծ Պարնի գյուղից Սուսաննան հարս է գնացել Նոյեմբերյանի շրջանի Բաղանիս գյուղ, ամուսնությունը զագսում գրանցվել է: Նրա ամուսինը՝ Իվան Կարապետյանը, 2000թ. Բաղանիսից արտագնա աշխատանքի է մեկնել, հիմնական բնակություն հաստատել Սոչիում: Սուսաննան միայնակ պահել, մեծացրել է 4 աղջիկներին, որոնք ամուսնացել են, հարս գնացել Ոսկեպար, Զովունի, Արարատ եւ Ապարան: Կինը մեծ զրկանքներ է կրել երեխաներին մեծացնելու, ընտանիքը հանապազօրյա հացով ապահովելու համար: Նա որպես բանվոր աշխատել է ծխախոտի հումքի ընդունման կետում, պահածոների արտադրամասում եւ այլուր: 45-ամյա կինն ասում է, որ երեխաներին սահմանամերձ Բաղանիսում պահելու համար բազում զրկանքներ է կրել, հետո իմացել, որ Իվանը Սոչիում ամուսնացել է ռուս կնոջ հետ, այդ կնոջ երեխային է պահում:
2015թ. Սուսաննայի ամենափոքր դուստրն ամուսնացել է: Դրանից հետո 17 տարի Ռուսաստանում բնակվող Իվանը զանգահարել է իր աղջիկներին, նրանց ասել, որ Սուսաննան լքի Բաղանիսի իրենց տունը, որովհետեւ իր ականջին շշուկներ են հասել, թե նա անբարո կյանք է վարում, իր անունը խայտառակում: Ի. Կարապետյանը դուստրերի միջոցով Սուսաննային սպառնացել է, որ կգա, կնոջը կսպանի, եթե նրան այդ տանը տեսնի: 2001թ. Իվանը Ռուսաստանում իր հորեղբոր տղա Վարդանին 3500 ԱՄՆ դոլար վճարելով՝ նրանից գնել է Բաղանիսում գտնվող միահարկ առանձնատուն: Սակայն նրանք տան առքուվաճառք չեն ձեւակերպել, տունը չի գրանցվել Իվան Կարապետյանի անվամբ: Տիկին Սուսաննան կարծում է, որ տան առքուվաճառքը դիտավորյալ չեն կատարել, որպեսզի Իվանը հետագայում, իր աղջիկների ամուսնանալուց հետո, կարողանա իրեն այնտեղից վտարել: Այժմ Իվանն ու նույնպես Ռուսաստանում բնակվող նրա հորեղբոր տղա Վարդանը ասում են, թե իբր Վարդանը հետո ետ է տվել տան վաճառքի 3500 դոլարը եւ տունը կրկին Վարդանի սեփականությունն է:
Աղջիկների միջոցով Իվանից սպառնալիքներ ստանալուց հետո վախեցած Սուսաննան 2016թ. նոյեմբերի վերջին տեղափոխվել է Ոսկեպար գյուղում ամուսնացած աղջկա տուն: Սակայն նա շուտով համոզվել է, որ փեսայի տանը երկար չի կարող ապրել: Ոսկեպարում խորհուրդ են տվել բնակվել հիվանդ, խնամքի կարիք ունեցող մի ոսկեպարցու տանը, որը կնոջ մահից հետո ապրել է իր 2 չափահաս տղաների հետ: Սուսաննան այդ տանը լվացք է արել, ճաշ պատրաստել, նրան տան մի սենյակ են տրամադրել: 2017թ. հունվարին ոսկեպարցի ընտանիքը եւ Սուսաննան տեղափոխվել են Ռուսաստան: Ընտանիքի չափահաս տղաները Վորոնեժում աշխատել են, Սուսաննան նրանց համար ճաշ է պատրաստել, լվացք արել, նրա գործը ծանր է եղել: Երեք ամիս Վորոնեժում մնալուց հետո, երբ լրացել է այնտեղ գրանցման ժամկետը, 2017թ. մարտին Սուսաննան վերադարձել է Բաղանիս:
Կարդացեք նաև
26 տարի սահմանամերձ Բաղանիսում աշխատած, տունը վերանորոգած, կահույքով, տնտեսական եւ այլ ապրանքներով լցրած կինը չի կարողանում իր տուն մտնել, քանի որ Իվանի հորեղբոր տղա Արսենը տան դուռը կողպեքով փակել է: 45-ամյա Սուսաննան գիշերելու տեղ չունի, ստիպված է քնել բաղանիսցի ծանոթների տներում: Այդ հարցով դիմել է Բաղանիսի վարչական ղեկավար Նարեկ Սահակյանին, վերջինս ասել է, որ դա իր իրավասության խնդիր չէ: Ս. Կարապետյանը դիմում է գրել ոստիկանության Նոյեմբերյանի բաժին, դիմումը քննության մեջ է:
Սուսաննա Կարապետյանն ասաց, որ 26 տարի սահմանամերձ Բաղանիսում 4 աղջիկ է պահել, մեծացրել, ովքեր ընտանիքներ են կազմել, ինքը՝ անտուն, փողոցում է հայտնվել: Իսկ Իվանը հայրենի, սահմանամերձ գյուղը լքելով՝ Սուսաննայի հետ օրինական ամուսնության մեջ լինելով, ռուս կնոջ հետ զագսով ամուսնացել է: Նա Ռուսաստանից կարողացել է այնպես անել, որ Սուսաննային չթողնեն տուն մտնել:
Սուսաննայի աղջիկները ապրում են դժվար, հոգսաշատ կյանքով, սակայն հոգեպես իրենց մոր հետ են, բարոյապես աջակցում են նրան: Սոչիում բնակվող Իվանն իր աղջիկներին հայտնել է, որ եթե նրանք մորն են պաշտպանում, կարող են իրեն մոռանալ: Կարապետյանների մեծ աղջիկը հորն ասել է՝ համարիր, որ քեզ արդեն մոռացել ենք:
Անտուն մնացած, հուսահատ Սուսաննա Կարապետյանն աջակցության խնդրանքով դիմել է Aravot.am-ի թղթակցին: Հուսանք, որ մեր այս հրապարակումից հետո իրավապահ, նաեւ ՝ իրավապաշտպան, կանանց իրավունքները պաշտպանող կազմակերպությունները կզբաղվեն Սուսաննա Կարապետյանի խնդրով:
Ոսկան ՍԱՐԳՍՅԱՆ
