Պետական եկամուտների կոմիտեին 180 միլիոն դրամ կհատկացնեն` հսկիչ-դրամարկղային մեքենաներով տնտեսավարողներին ապահովելու նպատակով: Գումարը կտրվի կառավարության պահուստային ֆոնդից: Այս մասին տեղեկանում ենք կառավարության նիստի օրակարգից:
Մայիսի 4-ին ՊԵԿ ղեկավար Վարդան Հարությունյանը կառավարության նիստում, ներկայացնելով այս նախագիծը, վարչապետին կհայտնի, որ գումարը տրամադրելու են «Հսկիչ-դրամարկղային մեքենաների ներդրման գրասենյակ» ՊՈԱԿ-ին` նոր սերնդի հսկիչ-դրամարկղային մեքենաների տրամադրման գործընթացի շարունակականությունն ապահովելու համար:
Պարոն Հարությունյանի հիմնավորմամբ, այս պահին ՊՈԱԿ-ի տրամադրության տակ առկա հսկիչ-դրամարկղային մեքենաների քանակությունն ավարտվում է եւ անհրաժեշտություն է առաջացել ձեռք բերել շուրջ 1000 հատ հսկիչ-դրամարկղային մեքենաներ. «Խնդիրը, սակայն, կայանում է նրանում, որ «Հսկիչ-դրամարկղային մեքենաների ներդրման գրասենյակ» ՊՈԱԿ-ը չունի բավարար ֆինանսական միջոցներ՝ հսկիչ-դրամարկղային մեքենաների ձեռքբերումն ու ներմուծումը սեփական միջոցներով կազմակերպելու համար»:
Վարդան Հարությունյանի ներկայացմամբ, ՊՈԱԿ-ի մոտ անհրաժեշտ ֆինանսական միջոցների բացակայությունը պայմանավորված է այն հանգամանքով, որ գործող կարգի համաձայն` հսկիչ-դրամարկղային մեքենաները որոշակի խմբերի հարկ վճարողներին տրամադրվում են էական զեղչ գներով կամ անհատույց:
Կարդացեք նաև
Լուսինե ԲՈՒԴԱՂՅԱՆ
