Այսօր Երեւանի քաղաքապետի թեկնածու Նիկոլ Փաշինյանը «Ելք» դաշինքի ավագանու թեկնածուների հետ քարոզարշավ իրականացրեց Էրեբունի համայնքում:
Մինչ քարոզարշավը լրագրողների հետ զրույցում նա ցուցադրեց Արցախի պողոտայի եւ Տիգրան Մեծի խաչմերուկում գտնվող մի պարսպապատ տարածք, որը վերածվել էր աղբանոցի:
Մեր հարցին՝ այդքան վա՞տ է վիճակը, ՀՀԿ-ի ավագանու անդամներն ասում են՝ սեւ ակնոցները հանեք, ընդդիմությունը ճանճ է փնտրում, որ փիղ դարձնի՝ Նիկոլ Փաշինյանը պատասխանեց. «Ստեղ սեւ ակնոցով մարդ չկա, ձեր ոչ սեւ օբյեկտիվը պտտեք ու նկարեք»:
Մեր հարցին՝ ձեր ծրագրում Երեւանի քաղաքապետարանի ծառայողական մեքենաները առնվազն 70 տոկոսով կրճատելու դրույթ կա: Ուսումնասիրություն արե՞լ եք, ովքե՞ր են տնօրինում այդ մեքենաները՝ Նիկոլ Փաշինյանը պատասխանեց, որ հաճախ փողոցով տեսնում են, «մեքենա է անցնում, վրան գրված է՝ Երեւանի քաղաքապետարանի առեւտրի եւ սպասարկման վարչություն, ինչ-որ մի հատ 21 տարեկան տղա մեջը նստած, ինչ-որ մի հատ ռեփ մաքսիմալ ձայնով միացրած, պատուհաններն իջեցրած, գոտին չգցած ցկցկում է փողոցում ու դրա համար մե՞նք ենք վճարելու: Էդ տղաներին ես խորհուրդ եմ տալիս մեքենաները կանգնեցնեն եւ իրերը հավաքեն, որովհետեւ իրենք շուտով պետք է գնան»:
Կարդացեք նաև
Նա ասաց, որ Երեւանի քաղաքապետարանում 2000 մարդ է աշխատում, հաստիքացուցակն ուռճացված է ու իր ընտրվելու դեպքում ցուցակով ձայն հավաքողները կգնան իրենց գործերին, իսկ պրոֆեսիոնալները կմնան՝ անկախ կուսակցական պատկանելությունից:
Հռիփսիմե ՋԵԲԵՋՅԱՆ
