«Ելք» դաշինքից Երևանի ավագանու թեկնածու Արայիկ Հարությունյանը հայտարարեց, թե «Երկիր Ծիրանիի» ավագանու թեկնածու Ստելլա Աղաջանյանի` Նիկոլ Փաշինյանի հասցեին հնչեցրած քննադատությունը ապաքաղաքական է:
Հիշեցնենք, որ «Երկիր Ծիրանի» կուսակցությունից Երևանի ավագանու թեկնածու Ստելլա Աղաջանյանը կասկածներ ունի, որ Նիկոլ Փաշինյանը մտել է քաղաքապետի համար պայքարի մեջ՝ ՀՀԿ-ին օգնելու համար:
«Հայելի» ակումբում լրագրողների հետ հանդիպմանը Արայիկ Հարությունյանն այս առիթով ասաց. «Այդտեղ պատճառահետևանքային կապը բացակայում է: Միանգամայն անտրամաբանական է, ապաքաղաքական և քաղաքագիտական որևէ քննադատության չի ենթարկվում: Չգիտեմ` ինչ նոու հաու է «Երկիր Ծիրանիի» կողմից այս թեզն առաջ տանելը»:
«Ելք» դաշինքից Երևանի ավագանու թեկնածու Մանե Թանդիլյանը ի պատասխան «Երկիր Ծիրանիի» ավագանու թեկնածուի այն հայտարարությանը, թե Նիկոլ Փաշինյանն արդեն պատգամավոր է, հետևաբար կասկածելի է ավագանու ընտրություններին նրա մասնակցությունը, ասաց. «Նիկոլ Փաշինյանն այսօր ամենակարևոր դերակատարներից է քաղաքականության մեջ, «Ելքի» ամենավառ ներկայացուցիչը: Նույն տրամաբանությամբ Տարոն Մարգարյանն էլ է պատգամավոր ընտրված և նույն ձևով կարող էր նաև Զարուհի Փոստանջյանը լինել: Մենք ասել ենք, որ մենք Երևանի ավագանու ընտրություններում քաղաքական բաղադրիչը չեք թերագնահատում: Նիկոլ Փաշինյանը կլինի լավագույն քաղաքական հակակշիռն այն ԱԺ-ի, որ այսօր ձևավորվել է»:
Կարդացեք նաև
Մանե Թանդիլյանը հավաստիացրեց, որ ջանք ու եռանդ չեն խնայում մարդկանց բացատրելու` ամենայն լրջությամբ վերաբերվեն այս ընտրություններին, քանի որ հակառակ դեպքում նրանց տեղը որոշելու են այլք. «Մենք պահելու ենք ձեր ձայնը և վճռորոշ է լինելու թե՛ Երևանի, թե՛ հանրապետության համար»:
Արայիկ Հարությունյանն էլ տեղեկացրեց, որ իրենց ծրագիրն ունեն երեք հիմնասյուներ. «Հաշվետվողականություն, ինչն այժմ բացակայում է քաղաքային իշխանությունների մոտ, արդյունավետ կառավարում և համաչափ զարգացում, ինչը ևս մեծագույն խնդիր է: Այս իշխանությունները տապալել են նաև տրանսպորտի ոլորտը, ինչը ևս մեզ համար կարևոր ոլորտ է»:
Մանե Թանդիլյանն էլ նշեց, թե ներկայացրել են առավելագույն իրատեսական ու չափելի ծրագիր:
Տաթև ՀԱՐՈՒԹՅՈՒՆՅԱՆ
