«Երկիր Ծիրանի» կուսակցությունից Երևանի ավագանու թեկնածու Ստելլա Աղաջանյանը կասկածներ ունի, որ Նիկոլ Փաշինյանը մտել է քաղաքապետի համար պայքարի մեջ՝ ՀՀԿ-ին օգնելու համար:
«Հայելի» ակումբում լրագրողների հետ հանդիպմանը նա հարցրեց` արդյոք զարմանալի՞ չէ այն, որ լինելով ՀՀ ԱԺ պատգամավոր` Նիկոլ Փաշինյանը մտել է քաղաքական պայքարի մեջ: Լրագրողների այն հարցին` դա նշանակո՞ւմ է, որ նա մտել է պայքարի մեջ ՀՀԿ-ին օգնելու համար, տիկին Աղաջանյանը դրական պատասխան տվեց. «Նա մտել է այդ պայքարի մեջ, որպեսզի ընտրողը չունենա երկու բևեռ: Այսօր ի սկզբանե բոլորը համոզված են, որ այլևս հնարավոր չէ տանել ՀՀԿ-ի իշխանությունը, անգամ ՀՀԿ-ի մեջ, հետևաբար որպեսզի այդ բևեռների պրկվածությունը մեղմվի, ներս է ընկել Նիկոլ Փաշինյանը: Այո, հնարավոր է, որ եկել է ՀՀԿ-ին օգնելու»:
«Երկիր Ծիրանի» կուսակցության Երեւանի ավագանու թեկնածու Վարուժան Անտոնյանն էլ, անդրադառնալով Տարոն Մարգարյանի քարոզարշավին, ասաց. «Դուք նկատե՞լ եք Տարոն Մարգարյանի նախընտրական ցուցապաստառի գույները` ծիրանագույն։ Սա նշանակում է իշխանափոխություն»:
Տիկին Աղաջանյանը վստահեցրեց, թե մեր երկիրը գահավիժում է, իսկ 10 տարի է Զարուհի Փոստանջյանի «անբասիր քաղաքական գործունեությունը հավատ է ներշնչում իրեն». «Անվերապահորեն վստահում եմ Զարուհի Փոստանջյանին` հաշվի առնելով նրա անկաշառությունը, կամային բնավորությունը»: Հարցին` «Երկիր Ծիրանին» ինչո՞վ է տարբերվում Նիկոլ Փաշինյանից և նրա ուժից, տիկին Աղաջանյանը պատասխանեց. «Մեր կուսակցության դեմքը կայուն, առանցքային, հզոր ներկայացուցիչը մեր առաջնորդն է` Զարուհի Փոստանջյանը, որն իր գործունեությամբ ապացուցել է, որ ինքն այնտեղ է, որտեղ կան խնդիրներ, կա ցավ, լուծելու հարց»:
Կարդացեք նաև
Ստելլա Աղաջանյանը հիշեց նաև հուլիսյան դեպքերը: Նրա բնորոշմամբ` այդ ընթացքում տասներեք օր ջարդուփշուր էին եղել, պարալիզացվել պետական բոլոր ինստիտուտները. «Մենք տեսանք ՊՊԾ գնդի գրավումն իրականացրած հերոսներին: Իսկ այդ կապակցությամբ նույնիսկ ԱԺ արտահերթ նիստ չհրավիրվեց, երբ խայտառակ ֆիասկո էր»:
Տաթև ՀԱՐՈՒԹՅՈՒՆՅԱՆ
