Մայիսի 14-ին կայանալիք Երեւանի ավագանու ընտրություններին մասնակցող «Երկիր Ծիրանի» կուսակցությունն այսօր իր քարոզարշավը շարունակեց Սարի թաղում:
Կուսակցության նախագահ, Երեւանի քաղաքապետի թեկնածու Զարուհի Փոստանջյանն իր համախոհների հետ քայլեց այն փողոցներով, որտեղ նախորդ տարի ոստիկանության ՊՊԾ գնդի գրավման ժամանակ ցույցեր են անցկացվել:
Կարդացեք նաև
Զարուհի Փոստանջյանը հասավ այն վայրը, որտեղ հուլիսի 29-ի գիշերը ոստիկանական ուժերը հատուկ միջոցներ, այդ թվում՝ լուսաձայնային նռնակներ էին կիրառել ցուցարարների, նրանց առաջնորդող քաղաքական գործիչների եւ լրատվամիջոցների ներկայացուցիչների հանդեպ:
«Այստեղ էինք մենք խաղաղ կանգնած, երբ ոստիկանությունը եւ վերջինիս պատրաստված խմբերը հարձակվեցին մեզ վրա: Երանոսյանի հրամանի ներքո նռնակները նետեցին…»,-վերհիշեց տիկին Փոստանջյանը, ապա շնորհակալություն հայտնեց սարիթաղցիներին, որոնք ապաստան են տվել ոստիկանական հատուկ միջոցներից տուժած քաղաքացիներին, նրանց պատսպարել իրենց տներում:
Զարուհի Փոստանջյանը հույս հայտնեց, որ հենց սարիթաղցիները մայիսի 14-ին երկիրը կմաքրեն ՀՀԿ-ից:
Հիշեցնենք, որ նույն վայրում փոխոստիկանապետ Լեւոն Երանոսյանը հայհոյել էր Զարուհի Փոստանջյանին: Վերջինս ասաց, որ նման միջադեպերն իրեն չեն կոտրում. «Հասնելու ենք նրան, որ Երանոսյանի արարքին իրավական գնահատական տրվի»:
Ի դեպ, փողոցներից մեկում գետնին ընկած էին ՀՀԿ քաղաքապետի թեկնածու Տարոն Մարգարյանի նախընտրական թերթոնները (լուսանկարում):
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
