Ինչպես տեղեկացրել ենք, Շիրակի մարզի Արթիկ քաղաքի թիվ 4 մանկապարտեզի վարիչ Հասմիկ Աջամօղլյանի կաբինետում «ժուչոկ» էին գցել՝ գաղտնալսելով նրա խոսակցությունները։ Ինչպես Aravot.am-ին պատմել էր տիկին Աջամօղլյանը, «ժուչոկ»-ը հայտնաբերվել է այն ժամանակ, երբ Արթիկի քաղաքապետարանի կողմից ստուգումներ էին անցկացվում իր գլխավորած կառույցում։ Հասմիկ Աջամօղլյանից անընդմեջ փաստաթղթեր են պահանջել, և երբ մի անգամ բացել է պահարանը՝ փաստաթղթեր հանելու, գաղտնալսող սարքն ընկել է։ Վերջինիս մեջ տեղադրված է եղել «Վիվասելի» հեռախոսային քարտ, որին միանալով՝ գաղտնալսել են բոլոր խոսակցությունները։
Քիչ առաջ Շիրակի մարզի դատախազ Կարեն Գաբրիելյանը մեզ տեղեկացրեց, որ Aravot.am կայքի «Տարօրինակ դեպք` Արթիկի թիվ 4 մանկապարտեզում. վարիչի կաբինետում «ժուչոկ» են գցել» վերտառությամբ հոդվածը իր հանձնարարությամբ ուղարկվել է Շիրակի մարզային քննչական վարչություն ՀՀ Քրեական դատավարության օրենսգրքի 180-181 հոդվածներով նյութեր նախապատրաստելու ու օրենքով սահմանված կարգով ընթացքը լուծելու նպատակով։
Նշենք, որ Արթիկում տարածված խոսակցությունների համաձայն, «ժուչոկը» գցել է քաղաքային իշխանավորներից մեկը, առայժմ զերծ ենք մնում անուններ հրապարկելուց, քանի դեռ չկան ապացույցներ։ Պատճառը, դարձյալ ըստ տարածված խոսակցությունների, այն է, որ մանկապարտեզի վարիչը թե՛ ՏԻՄ, թե՛ ԱԺ ընտրություններին չի սատարել Արթիկի քաղաքային ներկայիս իշխանություններին։
Կարդացեք նաև
Նունե ԱՐԵՎՇԱՏՅԱՆ
