Այսօր ձեզ կներկայացնեմ մեր ծրագրի այն դրույթները, որոնք վերաբերում եմ քաղաքի բարեկարգմանը, ինչպես նաև կանաչ տարածքների ստեղծմանը:
ՔԱՂԱՔԻ ԲԱՐԵԿԱՐԳՈՒՄ ԵՎ ԿԱՆԱՉ ՏԱՐԱԾՔՆԵՐ
Թամանյանի գլխավոր պլանի հիմքում ընկած էր քաղաք-այգու ստեղծման գաղափարը: Հայաստանում ապրիլից մինչեւ նոյեմբեր եղանակը շատ լավն է, բայց այգիների սակավ քանակությունը ստիպում է մարդկանց ազատ ժամանակն անցկացնել առեւտրի կենտրոններում:
Եղած այգիները շատ անմխիթար վիճակում են, խնամված չեն եւ վայրենացել են: Քաղաքի բարեկարգման եւ այգիների շինարարության վերաբերյալ լուծումները նախատեսում են ե՛ւ թամանյանական նախագիծը, ե՛ւ արդի համաշխարհային փորձը:
Այսօր Երեւանում մեկ շնչին ընկնող կանաչապատ տարածքը կազմում է 5 քառակուսի մետրից էլ պակաս, մինչդեռ, ըստ գիտնականների, այդ ցուցանիշը պետք է կազմի 25 քառակուսի մետրից ոչ պակաս: Նորք Մարաշի անտառի, Կասկադի երկկողմյա անտառի, Հաղթանակ զբոսայգու լանջի անտառածածկ հատվածի, Մալաթիա-Սեբաստիա համայնքում «Փարոսի» հարեւանությամբ գտնվող անտառի, Հրազդանի կիրճի, Օպերայի եւ Օղակաձեւ այգու, Դալմայի այգիների տարածքները նախագծվել եւ հանդիսացել են որպես Երեւան քաղաքի «շնչուղիներ եւ թոքեր»:
Կարդացեք նաև
Այսօր վերոնշյալ տարածքներն իրենց նպատակային նշանակությամբ այլեւս գոյություն չունեն: Այն, ինչ մնացել է այդ տարածքներից, պետք է պահպանել եւ նրանցում սկսել նոր անտառատնկում, արդեն կառուցապատված տարածքների համար, որոնք հնարավոր չէ քանդել, նախագծել նոր կանաչապատում` անտառատնկումով վերականգնելով պահանջվող բնապահպանական նորմերը:
Երեւանի բարեկարգման եւ կանաչապատման հիմնական խնդիրներն են.
• հնարավորինս վերականգնել Երեւանի գլխավոր հատակագծով նախատեսված կանաչ տարածքները,
• նախկին կանաչապատ տարածքների վերականգնման անհնարինության դեպքում կազմել ծրագիր` համալրելու կանաչ տարածքները, որպեսզի դրանք ներառեն մեկ մարդու հաշվարկով 25 քառակուսի մետրից ոչ պակաս:
Զարուհի ՓՈՍՏԱՆՋՅԱՆ
«Երկիր ծիրանի» կուսակցության ընտրացուցակով քաղաքապետի թեկնածու
