Մեր տեղեկություններով, անցած ուրբաթ օրը «Կոշ» ՔԿՀ-ում կոշտ վիճաբանություն է տեղի ունեցել կալանավայրի վարչակազմի և Մարդու իրավունքների պաշտպանի գրասենյակի աշխատակիցների միջև: Վերջիներիս արձանագրած թերություններն ու խախտումները վարչակազմի սրտով չէին, և նրանք փորձում էին մեղմել վիճակը: Մասնավորապես ՄԻՊ աշխատակիցներն արձանագրել էին զուգարանների անմխիթար վիճակը, որտեղ ջուր չկա և նույնիսկ շոգ եղանակներին կարող է համաճարակի պատճառ դառնալ: Ըստ նախնական տեղեկությունների կալանավայրի խմելու ջրատարին խառնվում են անձրևաջրերը:
Կարանտինային նախկին մասնաշենքը խիստ վթարային է, բայց այնտեղ դատապարտյալների արհեստագործական միավորումներն են աշխատում:
Դատապարտյալները դժգոհել են նաև բուժծառայության ցածր մակարդակից: Պարզաբանման համար դիմեցինք ՄԻՊ մամուլի խոսնակ Զոհրապ Եգանյանին, ու նա հայտնեց. «Պաշտպանի աշխատակազմի ներկայացուցիչների այցն անցել է նորմալ, արձանագրվել են որոշ խնդիրներ՝ կապված պայմանների հետ, որոնք արձանագրվել են և փոխանցվել վարչակազմին, վերջիններիս կողմից պատրաստակամություն է ցուցաբերվել վերացնելու մեր կողմից մատնանշված խնդիրները»:
Դավիթ ԱՐՄԵՆՅԱՆ
