Բուսաբանական այգում այսօր անցկացվեց սիրողական հեծանվասպորտի Երեւանյան գավաթի չորրորդ խաղարկությունը: Այն ՀՀ սպորտի եւ երիտասարդության հարցերի նախարարության աջակցությամբ կազմակերպել էր սիրողական հեծանվասպորտի եւ հեծանվային զբոսաշրջության ֆեդերացիան:
Ֆեդերացիայի նախագահ Արման Անտոնյանը լրատվամիջոցներին ասաց, որ իրենք բացի հեծանիվը փոխադրամիջոց օգտագործելու եւ հեծանվային զբոսաշրջությունը զարգացնելու ուղղությամբ աշխատելուց, լրջորեն զբաղվում են նաեւ սիրողական մրցաշարեր կազմակերպելով: «Երեւանյան գավաթը բաց է բոլոր հեծանվասերների առջեւ: Միակ բացառությունը տարիքային սահմանափակումն էր. մասնակիցը պետք է 16 տարեկանից մեծ լիներ, բայց այսօր նրանց կթույլատրենք մասնակցել մրցույթից դուրս» – ասաց ֆեդերացիայի նախագահը:
Մեկնարկի ելած շուրջ 50 հեծանվասերի մեջ ամենատարեցը Ագրարային համալսարանի ընդհանուր քիմիայի ամբիոնի վարիչ, 65-ամյա Օլեգ Քամալյանն էր: «Հեծանիվ վարում եմ երկու տարի: Երբեմն, հեծանվով եմ Ավան թաղամասից գնում աշխատանքի: Մասնակցում եմ այս ֆեդերացիայի միջոցառումներին», – ասաց պարոն Քարամյանը: Հարցին, թե հեծանիվն իրեն ի՞նչ է տալիս, պրոֆեսորը պատասխանեց. «Օգնում է մարզավիճակ պահպանել, շփվել, մրցել երիտասարդների հետ ու երիտասարդ մնալ: Չեմ ծխում, բակում նարդի չեմ խաղում: Ձեզ էլ խորհուրդ կտամ հեծանիվ ձեռք բերել»:
Աշոտ ՀԱԿՈԲՅԱՆ
