«Այդպես է աշխատում Տարոն Մարգարյանի թիմը: Անգամ ակնհայտ բաներն իրենց համար գտնելը խնդիր է: Եթե քաղաքացուն մեր ծրագիրը գտնելու համար պետք է 1,5 րոպե, գուցե Տարոն Մարգարյանի թիմին 5 տարի է պետք»,-Կենտրոն վարչական շրջանում այսօր Երեւանի ավագանու ընտրությունների նախընտրական քարոզարշավի ժամանակ անդրադառնալով ՀՀԿ քաղաքապետի թեկնածու Տարոն Մարգարյանի հայտարարությանը, թե ինքը փնտրել ու չի գտել «ԵԼՔ»-ի նախընտրական ծրագիրը, ասաց «ԵԼՔ»-ի քաղաքապետի թեկնածու Նիկոլ Փաշինյանը:
Հարցին՝ «իսկ Դուք ծանո՞թ եք ՀՀԿ-ի ծրագրին», Նիկոլ Փաշինյանն այսպես արձագանքեց. «Ես ծանոթ եմ նրանց արածներին: Տարոն Մարգարյանի նախորդ ծրագրի 60%-ը չի կատարվել»:
Փաշինյանը մեկնաբանեց նաեւ ՀՀԿ նախկին պատգամավոր Առաքել Մովսիսյանի (Շմայս) հայտարարությունը, թե վերջինս աջակցում է ՀՀԿ քաղաքապետի թեկնածու Տարոն Մարգարյանին:
Կարդացեք նաև
«Խնդրում եմ Առաքել Մովսիսյանին՝ առավելագույնս ակտիվ թող մասնակցի Տարոն Մարգարյանի քարոզարշավին»,-հեգնեց Փաշինյանը:
Ինչ վերաբերում է հարցին, թե նոր խորհրդարանում «ԵԼՔ»-ի պատգամավորների ցուցակում վերադասավորումներ կա՞ն, Նիկոլ Փաշինյանի խոսքով. «Այդ ցուցակի վերաբերյալ որոշում կայացրել են ընտրողները: Այդ որոշումն անբեկանելի է»:
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
