Ֆերմերների վստահեցմամբ` այս պահին հայկական շուկայում վարունգն ու պոմիդորը 90-95 տոկոսով տեղական են:
«Հայելի» ակումբում լրագրողների հետ հանդիպմանը ֆերմերները կարծիք հայտնեցին, որ գազի գնի էժանացումն ու Թուրքիայից լոլիկի ներմուծման խոչընդոտումը դրական ազդեցություն է ունեցել գյուղացու վրա:
Դարակերտ համայնքի ղեկավարի տեղակալ, ֆերմեր Վարուժան Խուդեդանյանը նշեց. «Այս գործընթացների արդյունքում առաջին անգամ մեր գյուղացիները չեն ունենա ժամկետանց վարկեր և կմտածեն արտադրության ծավալների ավելացման մասին: Օգնություն էր նաև այն, որ նոյեմբերի 1-ից մարտի 31-ը որքան էլ գազ ծախսեին ֆերմերները, վճարում էին 100 հազար դրամ: Սա էլ իր դրական ազդեցություն ունեցավ: Այնպես որ, եթե այսպես շարունակվի, Դարակերտից ոչ մեկը չի արտագաղթի»: Պարոն Խուդեդանյանը վստահեցրեց, որ այս պահին հայկական շուկայում 90-95 տոկոսով տեղական արտադրության լոլիկ ու վարունգ է. «Մայիսի 10-15-ը Հայաստանից լոլիկի և վարունգի արտահանում կսկսվի Մոսկվա և Կրասնոդար»:
Ֆերմեր Արմեն Սիմոնյանն էլ հակադարձեց, թե միայն թուրքական լոլիկի ներկրման խոչընդոտմամբ հարցը չի լուծվում. «Գյուղատնտեսության մակարդակը պետք է բարձրացնեն: Կասկածում եմ, որ գյուղատնտեսության նախարարությունը տեղյակ է բոլոր խնդիրներից: Մի լուրջ գյուղացու, ֆերմերի հետ կլոր սեղանի շուրջ չեն նստել: Գյուղնախարարի ոտքերը պետք է կեղտոտվեն ու ցեխոտվեն, որ գյուղացու խնդիրները հասկանան ու դրանց լուծում լինի»:
Կարդացեք նաև
Ֆերմերը նշեց, որ գյուղացին այսօր շատ խնդիրներ ունի, ուստի «միայն Եվրոպայից մասնագետ բերելով ու դասախոսություններ կարդալով` հարցը չի լուծվում»:
Նա նշեց, թե մեր ունեցած ապրանքը մեզ համար շատ է, իսկ դրսի համար` քիչ: Ֆերմերի կարծիքով` պետք է բարձրացնենք մեր արտադրողականության մակարդակը, և այդ դեպքում միայն կարող ենք Թուրքիայի հետ մրցունակ լինել, քանի որ մեր լոլիկն իր տեսքով և համային առումներով գերազանցում է թուրքականին, երկու անգամ օգտակար նյութերի քանակը նրանում բարձր է թուրքականից»:
Տաթև ՀԱՐՈՒԹՅՈՒՆՅԱՆ
