Ինչպես ավելի վաղ հայտնել էինք, օրերս Ադրբեջան հասավ ռուսական նորագույն ռազմական տեխնիկայի նոր խմբաքանակը, որը ԵԱՀԿ Մինսկի խմբի համանախագահ-պետություն Ռուսաստանն Ադրբեջանին մատակարարում է 2003թ. կնքված ռազմատեխնիկական գործակցության համաձայնագրի շրջանակում։
«Կա չգրված նորմ, որը կիրառվում է բոլոր միջնորդ-առաքելությունների կողմից: Այն է՝ չձեռնարկել այնպիսի քայլեր, որոնք առավելություն կտան այս կամ այն կողմին»,-թեմայի շուրջ Aravot.am-ի հետ զրույցում ասաց ՀՀ առաջին օմբուդսման, իրավապաշտպան Լարիսա Ալավերդյանը:
Նա նկատեց. «Ռուսաստանն ասել է՝ «նման նորմ չկա գրված եւ մենք շարունակելու ենք մեր բիզնեսն Ադրբեջանի հետ, բայց այնպես չենք անելու, որ ՀՀ-ն հայտնվի անբարենպաստ վիճակում»: Նշանակում է՝ ՌԴ-ն մի անգամ զենք է վաճառելու մի կողմին, հետո՝ մյուս կողմին»:
Ըստ մեր զրուցակցի, չնայած դրան, միեւնույնն է՝ տարածաշրջանում ավելի ու ավելի է զենք կուտակվում: «Անկախ նրանից՝ զենքն ո՞ւմ ես տալիս, նախադրյալ ես ստեղծում, որը տարածաշրջանային իրավիճակն ավելի լարված է դարձնում»,-ասում է տիկին Ալավերդյանը:
Կարդացեք նաև
Մանրամասն` տեսանյութում:
Լուիզա ՍՈՒՔԻԱՍՅԱՆ
