«Երեւանի համար կասկածելի գներով են նստարան ձեռք բերում: Մեկի համար մոտ 160 հազար դրամ է վճարվում: Կարծում եմ՝ դա ավելորդ ճոխություն է, դժվար թե այդ նստարանն այդքան արժենա»,-Դավթաշեն վարչական շրջանում այսօր Երեւանի ավագանու ընտրություններին մասնակցող «ԵԼՔ» դաշինքի քարոզարշավի ժամանակ լրագրողներին ասաց դաշինքի քաղաքապետի թեկնածու Նիկոլ Փաշինյանը:
Առողջապահության ոլորտից նա առանձնացրեց պոլիկլինիկաների խնդիրները. «Դրանց մեծամասնությունը նպատակին չի ծառայում: Հատակին, օրինակ, 74թ.-ի լինոլիում է…կամ մտեք զուգարան՝ սարսափելի վիճակ է…պոլիկլինիկաները վերածվել են քրոնիկ հիվանդներին դեղ բաժանող օբյեկտների, փոխանակ առողջության պահպանման հաստատություն լինեն»:
Կարդացեք նաև
Մետրոպոլիտենի առնչությամբ էլ Նիկոլ Փաշինյանը նշեց՝ քաղաքապետարանի հաշվետվություններում նշվում է, թե քաղաքապետարանը վերանորոգել է մետրոյի վագոններ, մինչդեռ իրականում այդ գումարները տվել են միջազգային կառույցները, օրինակ՝ ԵՄ-ն:
Քաղաքապետ ընտրվելու դեպքում մետրոյի առնվազն մեկ կայարան կառուցելու խոստմանը Նիկոլ Փաշինյանն ավելացրեց եւս մեկը՝ հինգ անգամ ավելի շատ միջազգային դրամաշնորհներ բերել Երեւանի համար:
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
