Հարավային Կովկասի հարցերով Եվրամիության ներկայացուցիչն իր տարածաշրջանային այցի շրջանակներում առաջին անգամ եղել է Հայաստանի սահմանամերձ շրջաններում, հանդիպել բնակիչներին: Հերբերտ Զալբերն այս և մի շարք այլ հարցերի շուրջ բացառիկ հարցազրույց է տվել «Ազատությանը»:
«Ազատություն»- Պարոն Զալբեր, ես ցանկանում եմ խոսել Հայաստանում տեղի ունեցած խորհրդարանական ընտրությունների մասին, Դուք այն դրական եք գնահատել: Ինչպես փոխանցում է Հայաստանի նախագահի մամուլի գրասենյակը, Դուք շնորհավորել եք Սերժ Սարգսյանին՝ ընտրությունների հաջող անցկացման կապակցությամբ, դա որակելով լուրջ քայլ դեպի առաջ՝ կայունության և երկրում ժողովրդավարության ամրապնդման տեսանկյունից: Բայց, ինչպես գիտեք, եվրոպացի դիտորդներն իրենց նախնական զեկույցում շեշտել են, որ ընտրությունները ստվերվել են ընտրակաշառքի և ընտրողներին ահաբեկելու մասին վստահելի տեղեկատվությամբ: Այս ամենը հաշվի առնելով, կարելի՞ է սա կոչել քայլ առաջ:
Հերբերտ Զալբեր- Տեսեք, երբ ես համեմատում եմ ընտրություններից հետո միջազգային դիտորդների զեկույցները, ապա արդարացի է ասել, որ դա քայլ առաջ է: Ոչ ոք չի ասում, որ այդ ընտրությունները կատարյալ էին, անգամ այս երկրի ղեկավարները դա չեն ասում: Նրանք ընդունում են, որ կան խնդիրներ, որոնք ապագայում շտկման կարիք ունեն: Բայց, երբ մենք համեմատում ենք նախկինում տեղի ունեցածի, ինչպես նաև տարածաշրջանի մյուս երկրների ընտրությունների հետ, այդ դեպքում արդարացի է ասելը, որ այս ընտրությունները լավ կազմակերպված էին, որ դրանք քիչ թե շատ արտացոլում էին ժողովրդի կամքը:
«Ազատություն»- Բայց մենք կարո՞ղ ենք խոսել ժողովրդի կամքի արտահայտման մասին, երբ կան հավաստի տեղեկություններ ընտրողներին ահաբեկելու մասին: Երբ մարդիկ ահաբեկված են, նրանք կարո՞ղ են ազատ կամք դրսևորել քվեարկելիս:
Կարդացեք նաև
Հերբերտ Զալբեր- Հարցն այն է, թե ինչ չափով է տեղի ունեցել այդ երևույթը: Ես հենվում եմ միջազգային դիտորդների գնահատականների վրա, և ընդհանուր պատկերն այն է, որ այն մանիպուլյացիաները, որոնք տեղի են ունեցել, չէին կարող նշանակալիորեն փոխել ընտրությունների արդյունքները:
«Ազատություն»- Ի դեպ, ընտրողների ահաբեկումների մասին ձայնագրություն կա, տեղյա՞կ եք այդ մասին:
Հերբերտ Զալբեր- Ոչ, կոնկրետ այդ ձայնագրությանը ծանոթ չեմ:
«Ազատություն»- «Կոնգրես-ՀԺԿ» դաշինքը վիճարկում է ընտրությունների արդյունքները Սահմանադրական դատարանում՝ պնդելով, որ լայնամասշտաբ կերպով ընտրակաշառք է բաժանվել, ընտրողներին ահաբեկել են և այլն: Այս ամենը հաշվի առնելով, ինչու՞ որոշեցիք գովաբանել այդ ընտրությունները:
Հերբերտ Զալբեր- Վստահ չեմ, որ գովաբանել բառը ճիշտ է ընտրված: Ես շնորհավորել եմ ընտրությունների հաջող անցկացման համար և կարծում եմ՝ սա արդար գնահատական է, որը չի ժխտում բացթողումները: Ինչպես ասացի՝ ոչ ոք դրանք չի հերքում, բայց, համեմատելով այն ամենի հետ, ինչ մենք տեսել ենք Հայաստանում նախկինում, հավանաբար մենք կարող ենք ասել, որ կա առաջընթաց:
Հարցազրույցն ամբողջությամբ՝ սկզբնաղբյուր կայքում
