Այսօր Սահմանադրական դատարանում ՀԱԿ-ՀԺԿ դաշինքի փաստաբան Վահե Գրիգորյանն իր ելույթում ասաց, որ այն ապացույցները, որոնք պահանջում է ՍԴ-ն ընտրությունների արդյունքներն անվավեր ճանաչելու համար, բոլոր այդ ապացույցները ՀՀԿ-ի ձեռքում են: Նա ասաց, որ ՀՀԿ-ն է վերահսկում այդ ամենը ու չափազանց բարձր ստանդարտներ է սահմանել ՍԴ-ն:
Այս առնչությամբ մեր հարցին ԿԸՀ նախագահ Տիգրան Մուկուչյանը պատասխանեց. «Սա առաջին դեպքն էր, երբ այս որակով դիմում էր ներկայացվել ՍԴ: Ապացույցները որեւէ կերպ ձեռք բերելու հնարավորության սահմանափակում որեւէ մեկի նկատմամբ առկա չեն եղել: Նախ, խոսվում է ապացույցների մասին, տեսահեռարձակման ընդհատումների մասին: Բոլոր կուսակցություններն ունեցել են առանձին գծով հնարավորություն հետեւելու բոլոր 1500 տեղամասերում ընտրական գործընթացին: Իսկ դա ուներ 90 տոկոսից ավելի ընտրողների ընդգրկում: Ինչ է, հնարավոր չէ՞ր այդ ապացույցները ձեռք բերել: Ներկայացվում էր միջնորդություն, որ այդ ամբողջ նյութը նստեն վերծանեն: Բարձրաձայնվեց, որ կա մեթոդոլոգիա, որով կարող են դա իրականացնել, եթե կար այդ մեթոդոլոգիան, անցել է 20 օրից ավելի ժամանակ, ինչ է, 20 հոգի չկայի՞ն, որ հավաքվեին եւ ձեռք բերեին այդ ապացույցները: Ո՞վ է խանգարել դիմում-բողոքներ ներկայացնել: Նշվում է, թե վստահված անձանց հետ կապված խոչընդոտներ են եղել տեղամասային ընտրական հանձնաժողովներում, իսկ ի՞նչն է խանգարել դրա վերաբերյալ տարածքային հանձնաժողովներ դիմում ներկայացնելու: Չի ներկայացվել որեւէ դիմում, նշանակում է՝ չի եղել նաեւ որեւէ խոչընդոտ»:
Ըստ նրա, դիմող կողմը, մինչեւ ՍԴ դիմելը, կարծես նախապես մտածել էր, թե քանի թերթ էին դրանք կազմելու: Հայտարարվում էր 800 անձանց տվյալներ, որ չեն մասնակցել քվեարկությանը, դատաքննության ընթացքում թող 8 անձի անուն ներկայացնեին, եթե կային:
Մեր հարցին՝ Դուք հերքո՞ւմ եք, որ ՀՀԿ-ն ունի վերահսկողություն օրենսդիր, գործադիր, դատական իշխանության վրա, ինչը նշեց Վահե Գրիգորյանը, այդ թվում նաեւ ձեր վրա ունի վերահսկողություն՝ Տիգրան Մուկուչյանը պատասխանեց. «Մեր վրա՝ ոչ: Մյուսների մասով, կարծում եմ, հարցը ճիշտ հասցեատիրոջը չեք ուղղում»:
Կարդացեք նաև
Պետական ռեսուրսների չարաշահման հետ կապված Տիգրան Մուկուչյանն ասաց, որ այդ գնահատականները, թե համատարած, մասսայական չարաշահումներ են եղել, մտացածին են. «Նման դատողություններ անելու համար անհրաժեշտ է ունենալ պատշաճ ապացույցներ: Մնացածը կարծիքներ են, տեսակետներ: Մենք գտնվում էինք դատարանում, դատարանում խոսում են փաստերով»:
Ըստ նրա, մենք գործ ունեինք մերկապարանոց հայտարարությունների հետ: Հարցին՝ տնօրենների ձայնագրությունները, ՍԱՍ-ի Արտակի նախընտրական ժողովի ձայնագրությունը փաստեր չէի՞ն՝ Տիգրան Մուկուչյանը պատասխանեց, որ մի քանի անգամ ձայնագրությունները լսել են. «Եթե այդ ձայնագրությունները լսում ես անկողմնակալ, ոչ թե կանխակալ, նախատրամադրված, գնահատականը այլ է լինում»:
Նա հարցրեց՝ որեւէ մեկի մոտ հարց առաջացե՞լ է, 114 դպրոցների եւ մանկապարտեզների տնօրենների ձայնագրությունը, որ ներկայացվեց, քանիսի՞ն էին զանգել, որ այդքանի ձայնագրությունը միայն ներկայացրեցին: Գուցե զանգել են բոլորին եւ ներկայացվածը կազմում է ընդամենը չնչին տոկոսը:
Հռիփսիմե ՋԵԲԵՋՅԱՆ
