Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում ԵԽԽՎ Գերմանիայի պատվիրակության անդամ Բեռնդ Ֆաբրիտիուսը ներկայացրեց «Ինտերպոլի համակարգի չարաշահումն ու ավելի խիստ իրավական երաշխիքների անհրաժեշտությունը» զեկույցը:
Նա հայտարարեց, որ բլոգեր Ալեքսանդր Լապշինի հետ արդարացիորեն չեն վարվել. «Լապշինը նման վերաբերմունքի է արժանացել իր` ԼՂ ճամփորդության պատճառով: Բայց, այնուամենայնիվ, ինտերպոլի ներքին համակարգերը լավ են աշխատել, և այս դեպքը ցույց է տալիս, որ ապահովվել է թափանցիկությունը և ինտերպոլի համակարգի գոյությունը կարող է օգնել խուսափել թյուրիմացություններից առանց վնասելու հետաքննությանը»:
Պարոն Ֆաբրիտիուսը կոչ արեց պատվիրակներին կողմ քվեարկել իր ներկայացրած զեկույցին, քանի որ այն կարևոր է ինտերպոլի համակարգի չարաշահումներից խուսափելու համար: Զեկուցողը եզրափակեց. «Ինտերպոլը, մարդու իրավունքների պաշտպաններն ու քաղաքացիական հասարակության ներկայացուցիչները Եվրոպայում մեկ կողմում են գտնվում, և ես սպասում եմ այս ձևաչափի միասնական քննարկման»:
Զեկույցի ներկայացումից հետո ծավալված քննարկման ընթացքում, երբ պատվիրակները կարճ ելույթներով էին հանդես գալիս, հեռակա բանավեճ ստացվեց ԵԽԽՎ հայկական պատվիրակության անդամ Նաիրա Կարապետյանի և Ադրբեջանի պատվիրակության անդամ Վուսալ Հուսեյնովի միջև:
Կարդացեք նաև
Նաիրա Կարապետյանը հայտարարեց, թե ԵԽ անդամ Ադրբեջանը Ինտերպոլի անունը օգտագործում է նման դեպքերի համար, և «կցանկանայի ձեզ ներկայացնել մի քանի այդպիսի դեպքեր: Օրինակ, Ադրբեջանը վերջերս դիմել է Բելառուսին` բլոգեր Ալեքսանդր Լապշինին ձերբակալելու համար»:
Այնուհետև ընդգծեց. «Ինտերպոլի չարաշահման այս անպատժելիության հետևանքն էլ ավելի ծիծաղելի է . Լապշինի արտահանձնման դեպքից 2 շաբաթ անց Ադրբեջանը միջազգային հետախուզում հայտարարեց Եվրախորհրդարանի 3 պատգամավորների, ովքեր Սահմանադրական հանրաքվեի դիտարկման համար այցելել էին Լեռնային Ղարաբաղի Հանրապետություն»:
Ի պատասխան Վուսալ Հուսեյնովը հավաստիացրեց, թե հայ գործընկերները փորձում են խեղաթյուրել փաստերը. «Կոչ եմ անում հայ գործընկերներին չխճճել այստեղ ներկա լսարանին»: Այնուհետև պնդեց, որ Լապշինը հանցագործ է. «Առանց Ադրբեջանի իշխանությունների թույլտվության նա այցելել է Ադրբեջանի տարածք, որն օկուպացվել է Հայաստանի կողմից»:
Ելույթների ավարտից հետո Բեռնդ Ֆաբրիտիուսը, արձագանքելով Նաիրա Կարապետյանին, հայտարարեց, թե Լապշինի գործով ինտերպոլի համակարգը չարաշահվել է բոլոր կողմերից, այդ իսկ պատճառով կարևորեց, որ հետագայում միայն կարմիր գծով ծանուցման դեպքում ինտերպոլը ինֆորմացիա տրամադրի:
Իսկ ադրբեջանցի պատվիրակին ի պատասխան հիշեցրեց, որ ինքը հավատարիմ է մնում իր կարծիքին, որն արտահայտել էր զեկույցը ներկայացնելիս:
Տաթև ՀԱՐՈՒԹՅՈՒՆՅԱՆ
