«Ցավում եմ, որ թուրքական կառավարությունը չեղյալ հայտարարեց իմ այցը Թուրքիա: Ես ցանկանում էի կառուցողական զեկույց պատրաստել և համագործակցել Թուրքիայի հետ»,-Aravot.am-ի հետ զրույցում հայտնեց ԵԽԽՎ Գերմանիայի պատվիրակության անդամ Բեռնդ Ֆաբրիտիուսը:
Հետաքրքրվեցինք` այդ չեղարկումը կապ ունի՞ ԵԽԽՎ-ի` մեկ օր առաջ ընդունած զեկույցի հետ, համաձայն որի`Թուրքիայում վերսկսվում է մոնիտորինգը, պարոն Ֆաբրիտիուսը պատասխանեց. «Ունեցել եմ կարճ զրույց Արդարություն և զարգացում կուսակցության փոխնախագահի հետ, և նա ինձ ասաց, որ Թուրքիայի կառավարության որոշումը ԵԽԽՎ-ի` մեկ օր առաջ ընդունած որոշման արդյունքն էր: Ես դիմել եմ նաև ԵԽԽՎ-ում թուրքական պատվիրակությանը, որպեսզի բարձրացնեն այս հարցը, քանի որ ես ցանկանում եմ մեկնել Անկարա և շարունակել կառուցողական համագործակցությունը: Կարևոր է ունենալ երկխոսություն Թուրքիայի հետ»:
Գերմանացի պատվիրակը հայտնեց, որ իրեն դեռ պատասխան չեն տվել. «Սպասում եմ: Ես դեռ իմ թռիչքները չեղյալ չեմ հայտարարել: Մայիսի 2-ին է թռիչքը, իսկ մայիսի 3-ից սկսած հանդիպումներ կային պլանավորված Թուրքիայի
արդարադատության նախարարի և սահմանադրական դատարանի նախագահի հետ: Եթե իրենց որոշումը հետ վերցնեն, ես կգնամ Անկարա, բայց դեռ սպասում եմ: Իհարկե, ես չեմ կարող այնտեղ գնալ որպես զբոսաշրջիկ»:
Նշենք, որ գերմանացի պատվիրակը զեկույց է պատրաստում «իրավական պետության սկզբունքներին Թուրքիայի հավատարմությունը» թեմայով:
Կարդացեք նաև
Ես ունեի Վենետիկի հանձնաժողովի արդյունքները, բայց ցանկանում էի ինքս մեկնել Թուրքիա ու ծանոթանալ իրավիճակին. «Ես կոչ եմ անում Թուրքիայի կառավարությանը վերանայել իրենց որոշումը: Եթե անգամ չվերանայեն էլ, վստահաբար շարունակելու եմ զեկույցի պատրաստումը: Եվս մեկ անգամ շեշտեմ, որ այդ զեկույցը չի լինելու պատժամիջոց, այլ իմ ցանկությունն է կառուցողական առաջարկներ ներկայացնել»:
Տաթև ՀԱՐՈՒԹՅՈՒՆՅԱՆ
