Սահմանադրական դատարանում կրկին վիճաբանություն եղավ Լեւոն Զուրաբյանի եւ ԿԸՀ նախագահ Տիգրան Մուկուչյանի միջեւ:
Հիշեցնենք, որ քննարկվում է ՀԱԿ-ՀԺԿ դաշինքի դիմումը՝ ԱԺ ընտրությունների արդյունքների վերաբերյալ ԿԸՀ որոշումն անվավեր ճանաչելու:
Դաշինքի փաստաբան Տիգրան Եգորյանը Տիգրան Մուկուչյանին հարցրեց՝ «Վերցրած բացատրությունները արդյոք ԿԸՀ-ի հանձնարարությամբ որեւէ այլ սուբյեկտի կողմից վերցրած բացատրություննե՞ր են»:
Մուկուչյանը պատասխանեց, որ արդեն ինքը պատասխանել է: Հարցը մի քանի անգամ վերաձեւակերպեց ու Մուկուչյանը սկսեց հեգնել՝ «Կետ, չակերտը բաց, ես արդեն պատասխանել եմ, չակերտը փակ, վերջակետ: Վե՛րջ»:
Կարդացեք նաև
Լեւոն Զուրաբյանը, տեղից նայելով լրագրողներին, ցուցամատը թափահարելով՝ ասաց, որ այստեղ է խնդիրը, նա չի ուզում պատասխանել, քարկապ է ընկնում, արդեն որերորդ անգամն է՝ հարցնում են:
Ցուցամատը տեսնելով՝ Տիգրան Մուկուչյանը արձագանքեց, թե մատդ քաշի, մատով մի խոսա:
Լեւոն Զուրաբյանն էլ բորբոքվեց. «Ես քո հետ խոսո՞ւմ էի, որ դու քո տեղից խոսում ես, զբաղվի քո գործով»:
ՍԴ նախագահ Գագիկ Հարությունյանը միջամտեց. «Կարող եմ ընդհատել նիստը եւ քննարկել ձեր վարքագիծը: Տեղից չի՛ կարելի»:
Լեւոն Զուրաբյանը սկսեց ցուցադրաբար իր ցուցամատը տնկել, շարժել, թափահարել՝ նյարդայնացնելով Մուկուչյանին:
Մուկուչյանը նետեց. «Ենթագիտակցության մակարդակն այդքան է»:
Զուրաբյանն ասաց. «Դու էդ մատի վրա շատ ես ոգեւորվում»: Մուկուչյանն էլ արձագանքեց. «Դու չի, ձեր ա»:
Գագիկ Հարությունյանը մի քանի անգամ փորձեց կարգի հրավիրել կողմերին:
Հռիփսիմե ՋԵԲԵՋՅԱՆ
