Ոստիկանության լիազոր ներկայացուցիչ Հովհաննես Քոչարյանն այսօր Սահմանադրական դատարանում, Կոնգրես-ՀԺԿ դաշինքի դիմումի քննության ժամանակ հայտարարեց, որ ապրիլի 2-ին կայացած խորհրդարանական ընտրությունների ժամանակ Ոստիկանությունը իրականացրել է իր գործառույթները, դիմող կողմն էլ դատարանում որեւէ փաստարկ չի բերել այդ գործառույթները չիրականացնելու վերաբերյալ:
«Փոխարենը հնչում են միայն մերկապարանոց հայտարարություններ: Փաստորեն պատասխանող կողմը եւ մենք`հարակից պատասխանողներս, ստիպված ենք հերքելու ոչ թե ծանրակշիռ ապացույցներ, այլ հնարածին, ցածրորակ, քաղաքական երանգավորումներ ունեցող հայտարարություններ: Բարձր դատարան, ներողություն են խնդրում հնարավոր հուզականության համար, բայց առավել նախընտրելի է նման դատավարական մրցակցության մասնակցել դեժավյուի ծանր զգացողությունների ներքո, ինչպես ասաց Լևոն Զուրաբյանը, քան գիտակցել, թե ինչ ահավոր հետևանքներ կարող է ունենալ դեմագոգիան և իրավական ինֆանտիլիզմը հասարակության վրա, հատկապես երբ դրանք դրսևորվում են այնպիսի բարձր ատյանում, ինչպիսին Սահմանադրական դատարանն է»,- հայտարարեց Հովհաննես Քոչարյանը:
ՍԴ-ում Կոնգրես- ՀԺԿ-ի դիմումի քննությունն այսօր ընդհատվեց: Նիստը կշարունակվի վաղը:
Նելլի ԳՐԻԳՈՐՅԱՆ
