Ապրիլի 25-ին ՆՓԱԿ-ում բացվեց «Հակասություններ. ՆՓԱԿ-ը 1996 թվականին» ցուցահանդեսը:
Ամենամյա Արվեստի փառատոնի բացումն այս տարի ՆՓԱԿ-ն ազդարարեց իր անցած ճանապարհի վերանայմամբ ու հետազոտությամբ: Թեպետ կենտրոնի հիմնադրման տարեթիվ համարվում է 1996 թվականը, այնուամենայնիվ այն արվեստի ոլորտում իր գործունեությունը սկսել է դեռևս 1992-ից՝ տարատեսակ խմբակային ցուցադրությունների միջոցով: Սրանք այն տարիներն էին, երբ Հայաստանի անկախացմանը զուգահեռ ժամանակակից արվեստի ոլորտում խմորվում էին արվեստի վերաձևակերպման, նոր հաստատությունների հիմնման խնդիրները: Նորարար փորձառական արվեստի կենտրոնը ևս անմասն չմնաց այս խմորումներից, ավելին՝ դրանք շարունակվեցին, նույնիսկ, հիմնադրումից մի քանի տարի անց. արվեստագետների պարբերաբար փոփոխվող կազմ ու մոտեցումների վերաձևակերպում:
Հաղթահարելով այս ամենը ՆՓԱԿ-ն այսօր ունի իր՝ արդեն հաստատված մոտեցումները: Այժմ այն բնորոշվում է որպես ամեն մեկի համար տեղ ունեցող մի չեզոք, բաց հարթակ, ինչը չի ենթադրում լարումներ և մեծ իմաստով նաև դիրքավորում:
Ցուցադրությունը ներկայացնում է կենտրոնի պատմությունը՝ իր ճանապարհին ունեցած առավել հիշարժան իրադարձությունների միջոցով. «Work in Progress/Գործընթաց» ցուցահանդես, դրա շուրջ Ար հեռուստաընկերության պատրաստած տեսանյութը, NՓԱԿ թերթ, «Հետոն», «Да, да, սակայն art» և մի շարք այլ ցուցահանդեսներ: Ինչպես նաև 2008-ին Արա Հովսեփյանի ու Գագիկ Չարչյանի կողմից նախաձեռնած արվեստային «արարքը», որ վերջիններս անվանեցին «մշակութային պլենեռ». հենց ցուցահանդեսի բացման ժամանակ արվեստագետները սկսում են նկարել ներկայացված ցուցադրանքը:
Կարդացեք նաև
Լառա ՀԱԿՈԲՅԱՆ
