Մամուլում տեղեկություններ են հրապարակվել, որ ՀՀ բնապահպանության նախարարության «Դիլիջան ազգային պարկ» ՊՈԱԿ տնօրեն Սահակ Մուրադյանն ասել է, թե ինքը արձակուրդից վերադառնալուց հետո հանձնում-ընդունում է կատարելու, քանի որ պարկի տարածքում մեծ թվով ծառահատումներ են կատարվել: Մի քանի անգամ զանգահարեցինք Սահակ Մուրադյանին , սակայն նրա բջջային հեռախոսահամարն անհասանելի էր:
Զանգահարեցինք ազգային պարկի փոխտնօրեն Վաղինակ Վասիլյանին: Նա ասաց, որ շուրջ 4 ամիս է, ինչ ինքը Դիլիջանի ազգային պարկում փոխտնօրեն է, երկրորդ ամիսն է, ինչ Ս. Մուրադյանն արձակուրդի մեջ է, իսկ ինքը տնօրենի ժամանակավոր պաշտոնակատար է: Նրա խոսքերով՝ Սահակ Մուրադյանը արձակուրդից կվերադառնա վաղը՝ ապրիլի 27-ին:
Երեւանի բնակիչ, անկուսակցական Վ. Վասիլյանին հարցրինք, թե Դիլիջանի ազգային պարկում վերջերս հայտնաբերված մեծածավալ ծառահատումներն իր՝ որպես տնօրենի ժամանակավոր պաշտոնակատար աշխատելու ժամանակաշրջանո՞ւմ են կատարվել: Նա ի պատասխան հարցրեց՝ նման պնդումները կարո՞ղ են տրամաբանական լինել, դրանք անհեթեթ են:
Ոսկան ՍԱՐԳՍՅԱՆ
