«Հայք» կենտրոնում այսօր լրագրողների հետ հանդիպմանը «Ազգային անվտանգություն» կուսակցության նախագահ Գառնիկ Իսագուլյանն անդրադարձավ ԱԺ ընտրությունների արդյունքներին՝ ասելով, որ դրանք վիճարկելն այնքան էլ ճիշտ չէ. «Ընտրողների ստորագրված ցուցակները հրապարակվեցին: Այս անգամ էլ 1,5 միլիոնից ավելի մարդ ընտրեց: ՀՀԿ-ն ամեն ինչ արեց, որ այդ վիճահարույց հարցի պատասխանը տրվի»:
Գառնիկ Իսագուլյանի խոսքով՝ արժանահավատ չեն նաեւ պնդումները, թե ընտրակաշառքն է ազդել ընտրությունների արդյունքների վրա. «Առկա է այդ երեւույթը, բայց արդյոք այն ունեցել է այդ ազդեցությունը, կարծում եմ՝ ոչ: Պատճառն այն էր, որ բացի ՀՀԿ-ից, ոչ մի կուսակցություն չէր պատրաստվել ընտրություններին եւ չէր հասկացել ԸՕ հիմնական պահանջները»:
ՀՀԿ-ն, Իսագուլյանի բնորոշմամբ, կարողացավ քարոզչության եռաշերտ կառուցվածք ստեղծել՝ թեկնածուներ, Կարեն Կարապետյան, ՀՀԿ նախագահ:
Կարդացեք նաև
«Վերջինս բոլոր տասներեք ընտրատարածքներում գրանցված բոլոր թեկնածուների հետ աշխատեց: Սրա մասին չի խոսվում: Նախագահ Սերժ Սարգսյանն անձամբ հանդիպել է ՀՀԿ բոլոր թեկնածուների հետ: Մյուս կուսակցությունները չկարողացան բոլոր ընտրատարածքներում թեկնածուներ ձեւավորել: Իսկ ՀՀԿ-ի բոլոր վարկանիշային թեկնածուներն ունեին իրենց շտաբները»,- նկատեց բանախոսը:
Գառնիկ Իսագուլյանը համաձայն չէ նաեւ կարծիքի հետ, թե ժողովուրդը ՀՀԿ-ին չսիրելով՝ ընտրեց վերջինիս. «Չսիրել՝ չի նշանակում ձայն չտալ: Ամենամրցունակ թիմը ձեւավորել է ՀՀԿ-ն: Չսիրելը քաղաքական կատեգորիա չէ»:
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
