Սահմանադրական դատարանում այսօր ԿԸՀ նախագահ Տիգրան Մուկուչյանը ՀԱԿ- ՀԺԿ դաշինքի փաստաբան Տիգրան Եգորյանին հարցեր ուղղեց:
Հիշեցնենք, որ ՍԴ-ում քննարկվում է ՀԱԿ-ՀԺԿ դաշինքի դիմումը՝ ԱԺ ընտրությունների արդյունքներն անվավեր ճանաչելու:
Տիգրան Մուկուչյանը հարցրեց, թե կարո՞ղ են հայտնել կոնկրետ որեւէ դեպք, երբ քարոզչությունն արվել է ծառայողական պարտականություններ կատարելիս:
Տիգրան Եգորյանը մատնանշեց վարչապետ Կարեն Կարապետյանին, արդարադատության նախարար Արփինե Հովհաննիսյանին, ՊՆ նախարար Վիգեն Սարգսյանին, մշակույթի նախարար Արմեն Ամիրյանին, Երեւանի քաղաքապետ Տարոն Մարգարյանին, բայց կոնկրետ դեպք չասաց, ասաց, որ նախընտրական քարոզչության ողջ ընթացքում է դա եղել: Հետո Եգորյանը մանրամասնեց, որ մարտի 6-ին «Դինամո» մարզադաշտում Կարեն Կարապետյանը ելույթ է ունեցել:
Կարդացեք նաև
Տիգրան Մուկուչյանը ծառայողական պարտականությունները կատարելիս քարոզչություն անել ասելով՝ նկատի ուներ դպրոցների եւ մանկապարտեզների տնօրեններին եւ նրանց հետ կապված Դանիել Իոաննիսյանի հայտնի ձայնագրությունները: Մուկուչյանին զարմացրել էր, թե ինչու են դիմումում «Իրազեկ քաղաքացիների միավորում» ՀԿ-ի ներկայացրած այդ ձայնագրությունների թիվը գրել 150: Երբ 114-ը կլորացնում ես՝ դառնում է 110 կամ 120, այդ 150-ը որտեղի՞ց են վերցրել:
Եգորյանը հիմնականում չէր պատասխանում Մուկուչյանի հարցերին՝ ասելով, որ հռետորական հարց է, ոչինչ չասող է եւ այլն:
Տիգրան Եգորյանը, ներկայացնելով ՀԱԿ-ՀԺԿ դաշինքի դիմումը, ասաց, որ 7 հոգեբուժական հաստատություններում արձանագրվել է ընտրողների 98 տոկոսի մասնակցություն, դրանցից 4-ում ՝ 100 տոկոս մասնակցություն:
Քրեակատարողականներում մասնակցությունը եւս շատ բարձր է՝ 89 տոկոս ու ՀՀԿ-ն հավաքել է 1052 ձայն: Զինծառայողների մասնակցությունը 86.9 տոկոս է կազմել: Նա նաեւ նշեց, որ տարածքային ընտրական հանձնաժողովներն ի զորու չեն գործելու անկախ, սեփական համոզմունքների հիման վրա վարույթ իրականացնելու: Կախման մեջ են ԿԸՀ-ից: ԿԸՀ-ն եւս չի հանդիսանում այդպիսի ատյան:
Հռիփսիմե ՋԵԲԵՋՅԱՆ
