ԱՄՆ նախագահ Դոնալդ Թրամփն իր «Ամերիկան առաջին տեղում» քաղաքականության շրջանակներում պատրաստվում է կրճատել զարգացող երկրներին հատկացվող ֆինանսավորումը: Այս մասին են վկայում Foreign Policy պարբերականի տրամադրության տակ հայտնված ԱՄՆ պետքարտուղարության փաստաթղթերը:
Դրանցից երևում է, որ կրճատումները սպասվում են արդեն 2018թ. ֆինանսական տարում: Մասնավորապես, Հայաստանին տրամադրվող ֆինանսական օգնությունը կկրճատվի 77,3 տոկոսով, ինչը նշանակում է, որ նախատեսված 17,633 մլն դոլարի փոխարեն Հայաստանը կստանա 4 մլն դոլար: Փաստաթղթերից երևում է, որ Ադրբեջանի ֆինանսավորումը կկրճատվի 100 տոկոսով, իսկ Վրաստանինը՝ 41 տոկոսով:
Զարգացող երկրների ֆինանսավորումները կրճատելու հաշվին ԱՄՆ-ը ցանկանում այդ միջոցներն ուղղվել ԱՄՆ ազգային անվտանգության խնդիրների լուծմանը: Նաև ենթադրվում է, որ ԱՄՆ Միջազգային զարգացման գործակալությունը, որը հենց պատասխանատու է այդ երկրներին օգնություն տրամադրելու համար, կմիացվի Պետքարտուղարությանը:
Պատրաստեց՝ Վիկտորյա ԱՆԴՐԵԱՍՅԱՆԸ
