«Ելք» դաշինքի առաջնորդներից «Հանրապետություն» կուսակցության նախագահ Արամ Սարգսյանը Ծիծեռնակաբերդում լրագրողների հետ զրույցում ասաց, որ Ցեղասպանության 100-ամյա տարելիցից հետո ինքը Հայաստանի իշխանությունների վարած քաղաքականությունում պահանջատիրության առումով փոփոխություն չի տեսնում: Հիշեցնենք՝ Ցեղասպանության 100-ամյա տարելիցի միջոցառումները 2 տարի առաջ կայացան «Հիշում ենք եւ պահանջում» կարգախոսի ներքո:
«Ես ընդհանրապես այն կարծիքին եմ, որ մենք՝ որպես ժողովուրդ, թե կորուստներ, թե ձեռքբերումներ ու հաղթանակներ ունենք, ու հիմա՝ երբ պետություն ու պետականություն ենք, դրանից հետեւություններ չենք արել: Որովհետեւ եթե հետեւություն անեինք, կհասկանայինք, որ մեր անվտանգության առաջին երաշխավորն ու ապահովողը մենք ինքներս ենք՝ մեր բանակով, ոչ թե հույսներս կդնեինք ուրիշների իսկանդերների ու չգիտեմինչերի վրա եւ դրանով գլուխ կգովեինք»,- ասաց Արամ Սարգսյանը:
Նա կարծում է, որ պիտի տեսնեինք այն պարզ իրողությունը, որ Հայաստանը այլընտրանք չունի, քան ժողովրդավարության կղզյակ լինելն է. «Չի կարելի սեփական ժողովրդին ատել այնքան, որ 10 հազար դրամով քվեարկել, չի կարելի մարտիմեկեր անել ու փողոցում կրակել սեփական ժողովրդի վրա, որ սեփական իշխանությունն այդքան չարժե, որի համար կարելի է երկիրն այս վիճակին հասցնել»:
Կարդացեք նաև
Արամ Սարգսյանը կարծում է, որ անմեղ զոհերի կամ առհասարակ պատերազմում զոհվածների հիշատակը հարգելու լավագույն ձեւը ուժեղ պետություն ունենալն է: Մի բան, որն իր կարծիքով՝ մենք չունենք:
Նելլի ԳՐԻԳՈՐՅԱՆ
