Քիչ առաջ մեկնարկած Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում ԵԽԽՎ պատվիրակներն իրենց դժգոհությունը հայտնեցին այն առիթով, որ ԵԽԽՎ նախագահ Պեդրո Ագրամունտն այցելել է Սիրիա:
Նրանք պահանջեցին, որպեսզի Ագրամունտը Սիրիայի հարցով առանձին լսումներ կազմակերպի, սակայն նա պնդում էր, թե այդ հարցը կարող է Բյուրոն քննարկել: Այս վարքագիծը հունից հանեց որոշ պատվիրակների:
Նրանք հանդես եկան հայտարարություններով. «Դուք կորցրել եք Ձեր վստահությունը», «Դուք այլևս չեք կարող ներկայացնել ԵԽԽՎ-ն», «Ժամանակն է, որ Դուք ինքնակամ հրաժարվեք Ձեր պաշտոնից և Ձեր տեղը զիջեք ԵԽԽՎ փոխնախագահներից մեկին»:
Պեդրո Ագրամունտը ստիպված 10 րոպեով ընդմիջեց նիստը:
Կարդացեք նաև
Aravot.am-ի հետ զրույցում լիտվացի պատվիրակ Կեստուտիս Մասիուլիսը նշեց. «Պեդրո Ագրամունտը ընկերն է մի երիտասարդի, որի անունն է Պուտին, որն էլ մարդասպան Ասադի ընկերն է: Ագրամունտը պետք է հեռանա, նա չի կարող ներկայացնել ժողովրդավարական արժեքներն ու ժողովրդավար պատգամավորներին: Այդ անձը կորցրել է իր դեմքը և չի կարող մեր ներկայացուցիչը լինել: Սիրիա` իր կատարած այցով նա միայն լեգիտիմացնում է Պուտինի ծրագրերը: Նա Պուտինին նետում է փրկօղակ»:
Պարոն Մասուլիուսը մտահոգություն հայտնեց, որ Ագրամունտին հեռացնելու իրավական ընթացակարգ չկա. «Մենք պահանջում ենք, որ նա քվեարկության դնի այն հարցը, թե որքան են նրան վստահում: Այսպիսի սկանդալից հետո նա պետք է ինքնակամ հեռանա»:
Տաթև ՀԱՐՈՒԹՅՈՒՆՅԱՆ
