Այսօր Վանաձորի Սբ. Գրիգոր Նարեկացի եկեղեցու բակից մեկնարկեց ջահերով երթ՝ դեպի Սբ. Մարիամ Աստվածածնի եկեղեցի: Վանաձորցիները՝ Հայաստանի ու Արցախի հանրապետությունների դրոշներով, պաստառներով եւ կոչերով եւս մեկ անգամ ոգեկոչեցին ցեղասպանության անմեղ զոհերի հիշատակը:
«Երթերի, ջահերով երթերի կերպը միաբանության ձեւ ցույց տալու կերպերից մեկն է: Այստեղ ավելի շատ, երանի, թե իրապես այն միաբանության ոգին տիրի, որով ավելի քաղաքական որոշումը, քաղաքականապես հասունությունը յուրաքանչյուր տարի ավելի խոսուն կլինի: Ես կարծում եմ, որ աղոթքով, ուխտով եւ համոզումով մենք դեռ շատ երկար ճանապարհ ունենք անցնելու: Իսկ այս երթն այդ ճանապարհի մի կտորն ապացուցելու մասերից մեկն է»,- ասում է Սբ. Գր. Նարեկացի եկեղեցու հոգեւոր հովիվ տեր Վահան քահանա Ազարյանը:
«Բայց մենք հավերժ ենք մեր լեռների պես», «Հայեր, փրկիչների մի սպասեք, դուք եք ձեր փրկիչը», «Կանք, պիտի լինենք ու դեռ շատանանք» գրությամբ պաստառներով ու հայրենասիրական երգերով, երթի մասնակիցները պահանջում էին վերականգնել պատմական արդարությունը:
Երթին մասնակցում էին՝ երիտասարդներ, պաշտոնատար եւ հոգեւոր այրեր, ԵԿՄ անդամներ: Նրանք Սբ. Աստվածածին եկեղեցու բակում գտնվող Նահատակաց պուրակում հարգանքի տուրք մատուցեցին Եղեռնի զոհերի հիշատակին: Ապա շարժվեցին դեպի Հայքի հրապարակ, որտեղ մոմերով խաչ կազմեցին:
Կարդացեք նաև
Մանրամասները՝ տեսանյութում
Տաթեւիկ ՂԱԶԱՐՅԱՆ
