Gallup International Association-ի Հայաստանում լիիրավ անդամ «Էմ Փի Զի» ՍՊԸ տնօրեն Արամ Նավասարդյանը ապրիլի 22-ին «Զարկերակ» մամուլի ակումբում ներկայացրեց նոր հարցման արդյունքները՝ «Երևան քաղաքի հիմնախնդիրները, քաղաքապետի թեկնածուների վարկանիշը» թեմայով:
Հարցումը կատարվել է Երևանում ապրիլի 12-20-ը ընկած ժամանակահատվածում, հարցմանը մասնակցել է 1044 անձ:
Հարցին՝ ինչպե՞ս կգնահատեք ընդհանուր առմամբ Երևան քաղաքի փոփոխությունները վերջին 4 տարիների ընթացքում, հարցվածների 1.6 տոկոսը դժվարացել է պատասխանել, 9.4 տոկոսը լիովին դրական է գնահատում, 14 տոկոսը՝ բացասական, 19.8 տոկոսը՝ ավելի շուտ բացասական, իսկ 55.2 տոկոսը՝ ավելի շուտ դրական:
Հարցին՝ Երևանի քաղաքապետի թեկնածուներից ո՞վ ունակ կլինի լուծել Երևան քաղաքի հիմնախնդիրները, հարցվածների 2.4 տոկոսը դժվարացել է պատասխանել, 10.44 տոկոսը այլ պատասխան է տվել, 8.6 տոկոսը պատասխանել է ոչ մեկը: 4.2 տոկոսը կարծում է, որ Զարուհի Փոստանջյանը ունակ է լուծել հիմնախնդիրները, 12.1 տոկոսը՝ Նիկոլ Փաշինյանը, իսկ 62.3 տոկոսը՝ Տարոն Մարգարյանը:
Կարդացեք նաև
Կազմակերպությունը հետաքրքրվել է նաև, թե ում են պատրաստվում իրենց ձայնը տալ քաղաքացիները: Հարցվածների 10.7 տոկոսը դժվարացել է պատասխանել, 12.7 տոկոսը հրաժարվել է պատասխանել, 3.9 տոկոսը պատրաստվում է ընտրել Զարուհի Փոստանջյանին, 11.5 տոկոսը՝ Նիկոլ Փաշինյանին, իսկ 61.2 տոկոսը՝ Տարոն Մարգարյանին:
Ամի ՉԻՉԱԿՅԱՆ
