Սպորտի մասին պատկերացումներն ամբողջ աշխարհում տարբեր են։ Կան մարդիկ, ովքեր գտնում են, որ սպորտով զբաղվելն անիմաստ է և դառնում է ժամանակի անիմաստ կորուստ։ Սակայն ավելի շատ դեպքերում պնդում են հակառակը։ Բարեբախտաբար, երկրորդ տիպին պատկանողներն աշխարհում ավելի շատ են։
Սպորտի կարևոր հատկությունների մասին բազմիցս է խոսվել է. առողջության բարելավում, բնավորության դրական փոփոխություն և անգամ մտավոր շարժ՝ միտքը սկսում է ավելի արագ աշխատել։ Մի կարևոր փաստ ևս՝ սպորտն ունակ է համախմբել մարդկանց՝ անկախ տարիքային և սեռական սահմանափակումներից։
Ամիսներ առաջ ՀՀ սպորտի և երիտասարդության հարցերի նախարարությունը սկսեց «Կյանքը՝ սպորտի ռիթմով» անունը կրող մասսայական մարզումները։ Մարզումներն անցկացվում են Կարեն Դեմիրճյանի անվան մարզահամերգային համալիրի հարակից տարածքում և «Թումո» ստեղծարար տեխնոլոգիաների կենտրոնին կից այգում:
Կարդացեք նաև
Հերթական շաբաթ օրը Aravot.am-ը ներկա գտնվեց մասսայական մարզումներին։
ՀՀ սպորտի և երիտասարդության հարցերի նախարարի խորհրդական Վլադիմիր Հովհաննիսյանի խոսքով որոշվել է մարզումներն ավելի կազմակերպված դարձնել.«Քանի որ նախարարության որդեգրած քաղաքականության մեջ կարևոր տեղ է զբաղեցնում առողջ ապրելակերպի քարոզն ու մասսայական սպորտի զարգացումը, մենք որոշեցինք այդ մարզումներն ավելի կազմակերպված ու մասսայական դարձնել»։
Ֆիտնես մարզիչների կողմից մշակվել է հատուկ ծրագիր տարբեր տարիքային խմբերի, քաշի նվազեցման, մկանային մասսայի ավելացման համար։
Այն հարցին, թե հնարավո՞ր է շատանան մարզումների օրերը, թե ոչ, Վլադիմիր Հովհաննիսյանը պատասխանեց, որ զբաղվածությունը թույլ չի տալիս մարզումները շաբաթական 2 անգամ անցկացնել։ «Շաբաթական մեկ օր ենք ընտրել, որ այն մարդիկ, ովքեր ունեն ժամանակի խնդիր, մեկ օր տրամադրեն սպորտին, առողջ ապրելակերպին»։
Բազմիցս նշվում է նաև, որ նախարարությունը նպատակ ունի մասսայական մարզումներ իրականացնել նաև Հայաստանի մյուս քաղաքներում։
Լիդիա ԿԱՐԱՊԵՏՅԱՆ
