Վանաձորի քաղաքապետ Մամիկոն Ասլանյանը մեջբերելով այս տարվա հունվարի 1-ից ուժի մեջ մտած ՏԻՄ օրենքի 64 հոդվածի 3-րդ եւ 4-րդ կետերը, ըստ որի՝ ավագանու նիստեր կարելի է գումարել նույնիսկ 9 հոգով, արդեն 2-րդ անգամ անցկացնում է համայնքի ավագանու նիստ: 2 նիստերին էլ 33 անդամներից ներկա էին ՀՀԿ-ն ու ՀՅԴ-ն ներկայացնող թվով 15 ավագանու անդամներ: Ընդդիմադիր ուժերը՝ «Լուսավոր Հայաստան», «Հայկական վերածնունդ» եւ «Բարգավաճ Հայաստան» կուսակցությունները շարունակում են բոյկոտել՝ չմասնակցելով նիստերին:
Դեռ մարտի 31-ին կայացած ավագանու առաջին նիստից հետո, «Լուսավոր Հայաստան» կուսակցության խմբակցության ղեկավար, ավագանու անդամ Քրիստ Մարուքյանը հայտարարեց, որ նիստն իրավազոր չէ, եւ իրենք պատրաստվում են քայլեր ձեռնարկել:
Այսօր արդեն Aravot.am-ի հետ զրույցում Քրիստ Մարուքյանն ասաց, որ հստակեցրել են իրենց հետագա քայլերը եւ պատրաստվում են դիմել Սահմանադրական դատարան:
Կարդացեք նաև
«Մենք պատրաստվում ենք վիճարկել, որովհետեւ իրենք ապօրինի նիստեր են անում: Եվ հնարավոր բոլոր օրենքները խախտվել են: Նախ` ՏԻՄ օրենքը, հետո բյուջետավորման մասին օրենքը, խախտել են նաեւ ժողովրդավարության սկզբունքները, որովհետեւ ոչ մի տեղ չի լինում, որ փոքրամասնությունը մեծամասնության փոխարեն բան է որոշում: Այս պահին մենք հայցադիմում ենք պատրաստում, որ դիմենք Սահմանադրական դատարան, որպեսզի նախ օրենքի մեկնաբանությունը եւ հիմնավորումները ճիշտ ստանանք, եւ եթե կա հակասություն, այդ հակասությունը ՍԴ-ն հակաիրավական ճանաչի եւ փոփոխություն մտցնի մեջը»:
Իսկ մինչ այդ, ավագանու կողմից հաստատված որոշումների մի մասն արդեն իսկ մտել է ուժի մեջ: Մարուքյանի խոսքով վիճարկման հետեւանքով 2 նիստերի ընթացքում կայացված այդ որոշումները կճանաչվեն անվավեր:
Տաթեւիկ ՂԱԶԱՐՅԱՆ
