Եթե տանը դեռ մնացել է չրեղեն, ապա կարելի է արագ պատրաստել համեղ եւ շատ օգտակար օշարակ: Այն պատրաստելու համար անհրաժեշտ է 150 գրամ թարմ կամ չորացրած արքայախոտ` ռեհան, 100 գրամ խնձորաչիր, նույնքան տանձաչիր, 40 գրամ նռան հատիկներ: Ինչպես նաեւ 100 գրամ մեղր, սպիտակ գինի` 50 գրամ, քերած մշկընկույզ (համեմունք) 10 գրամ, 1 կիտրոնի հյութ:
Պատրաստման եղանակը: Խնձորաչիրը, տանձաչիրը լավ լվանալ, լցնել 2 լիտր եռացող ջրի մեջ, թողնել 15-20 րոպե, այնուհետեւ ավելացնել թարմ կամ չորացրած ռեհանը, նռան հատիկները, քերած մշկընկույզը, կիտրոնի հյութը եւ մեղրը: Եռացնել եւս 15 րոպե, ապա կրակն անջատելուց 2 րոպե առաջ լցնել սպիտակ գինին:
Նախընտրելի է, որ կիտրոնի հյութն ու մեղրը օշարակին ավելացնել վերջում, երբ այն կլինի արդեն գոլ, որպեսզի պահպանվեն վիտամինները:
Սառած օշարակի մեջ լցնել նռան հատիկներ եւ մատուցել սառը վիճակում:
Այս օշարակը կոչվում է «Արքայախոտով եւ մեղրով Տալվորիկի օշարակ», որի բաղադրությունը հանրությանն է փոխանցում հայկական հնագույն խոհանոցի մասնագետ Սերգեյ Հունանյանը:
Այս օշարակը օգտակար է մրսածության ժամանակ, ստամոքսային բորբոքումների, կոկորդացավի ժամանակ: Որոշ փորձերից պարզ է դարձել նաեւ, որ այս ըմպելիքը անգերազանցելի միջոց է գլխացավերի բուժման համար:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
19,04.2017
