Սեւանա լճում իշխանի պաշարները վերականգնելու նպատակով կառավարությունն իր պահուստային ֆոնդից 2 միլիարդ դրամ կհատկացնի գյուղատնտեսության նախարարությանը: Գումարը կտրվի «Սեւանի իշխանի պաշարների վերականգնման եւ ձկնաբուծության զարգացման հիմնադրամին»:
Նախագիծը կառավարության նիստում կներկայացնի գյուղնախարար Իգնատի Առաքելյանը: Ըստ նախագծի, համալիր ծրագրի շրջանակներում ավարտվել են մանրաձկան արտադրության գործարանի շինարարական աշխատանքները եւ այն հանձնվել է շահագործման:
Սեւանա լճում արդեն իսկ տեղակայվել է առաջին ցանցավանդակային տնտեսությունը: Ծրագրով նախատեսվում է 2017 թվականին Սեւանա լճում տեղակայել եւս մեկ ցանցավանդակային տնտեսություն, որը բաղկացած կլինի 12 ցանցավանդակներից եւ այլ օժանդակ ենթակառուցվածքներից:
Ըստ նախարարի, գործընթացի արժեշղթայի ամբողջականությունն ապահովելու նպատակով նախատեսվում է նաեւ կառուցել բացօթյա ավազաններ՝ ձկան ծնողական կազմի համար, ինչպես նաեւ ձկան բազմացման կայան`սելեկցիոն տնտեսություն:
Կարդացեք նաև
Ապրանքային ձկան արտադրությունը իրականացվելու է լճում տեղակայված տնտեսություններում, հետեւաբար այդ գործընթացը իրականացնելու նպատակով` անհրաժեշտ է ունենալ համապատասխան ջրային փոխադրամիջոցներ, սպասարկման, այլ ընթացիկ աշխատանքները կազմակերպելու համար:
Նելլի ԲԱԲԱՅԱՆ
