Զանգվածային լրատվության որոշ միջոցներ տեղեկատվություն են տարածել, թե ՀՀ ոստիկանությունը 207,070,258 դրամ է ծախսելու փոստային ծառայությունների համար, և «Հայփոստի» հետ մարտի 21-ին կնքված պայմանագրի վերջնաժամկետը դեկտեմբերի 20-ն է։
Իրականում խոսքը ոչ տարեկան փոստային ծառայությունների մասին է, ոչ էլ ոստիկանության կատարելիք ծախսերի:
ՀՀ ընտրական օրենսգրքի 13-րդ հոդվածի 6-րդ մասի համաձայն՝ բնակչության պետական ռեգիստրը վարող՝ ՀՀ կառավարության կողմից լիազորված մարմինը` ՀՀ ոստիկանությունը քվեարկության օրվանից ոչ ուշ, քան 4 օր առաջ ընտրողներին ուղարկում է ծանուցագրեր` քվեարկության օրվա, ընտրական տեղամասի համարի, տեղամասային կենտրոնի հասցեի և ժամանակի մասին:
Նշված ծախսերը ֆինանսավորելու նպատակով ՀՀ 2017 թ. պետական բյուջեով՝ «02. ՀՀ ազգային ժողովի պատգամավորների ընտրություններ» ծրագրով ՀՀ ոստիկանությանը բյուջետային ծախսերի տնտեսագիտական դասակարգման «Կապի ծառայություններ» 4214 հոդվածով հատկացվել է 250.2 մլն. դրամ:
Ընտրողների ճշտված թվին համապատասխան ՀՀ ոստիկանության և «Հայփոստ» ՓԲԸ-ի միջև 2017 թ. մարտի 21-ին կնքվել է պայմանագիր, միավորը` 98.75 դրամ/ծանուցագիր գնով, 207.070.257,5 դրամ գումարով:
Կարդացեք նաև
«Գնումների մասին» ՀՀ օրենքի 23-րդ հոդվածի 1-ին կետի 1) ենթակետի և ՀՀ կառավարության 10.02.2011թ. թիվ 168-Ն որոշման 25-րդ կետի 5) ենթակետով հաստատված աղյուսակի 26-րդ տողի համաձայն՝ փոստային կապի ծառայությունների գնման գործընթացն իրականացվում է առանց գնումների հայտարարությունը նախապես հրապարակելու բանակցային ընթացակարգով (մեկ անձից կատարվող գնումներ):
Հավելենք, որ նույն կարգով ՀՀ 2017թ. պետական բյուջեով «13. Երևան քաղաքի ավագանու անդամների ընտրություններ» ծրագրով ՀՀ ոստիկանությանը բյուջետային ծախսերի տնտեսագիտական դասակարգման «Կապի ծառայություններ» 4214 հոդվածով հատկացվել է 81.3 մլն. դրամ:
Զանգվածային լրատվության միջոցների ներկայացուցիչներին կրկին կոչ ենք անում՝ ոստիկանության վերաբերյալ հրապարակումներ պատրաստելիս դիմել ոստիկանության համապատասխան ծառայություններին՝ ճշգրիտ ու պրոֆեսիոնալ տեղեկատվություն ստանալու և ընթերցողին թյուրիմացություններից զերծ պահելու համար:
ՀՀ ոստիկանություն
