«Ընդդեմ իրավական կամայականության» փաստաբան Արա Ղարագյոզյանն Aravot.am-ին տեղեկացրեց, որ ՀՀ քրեական վերաքննիչ դատարանում ապրիլի 4-ին՝ բողոքի քննության ժամանակ, իր պաշտպանյալ Արայիկ Խանդոյանը տեսնելով, որ նիստը դռնփակ է ընթանում, բորբոքվել է, ու դիմելով դատախազին, ասել է. «Ես չեմ ուզում ձեզ տեսնել, քանի որ դուք եք սպանել իմ եղբորը՝Հաց բերողին»:
Ըստ Ա.Ղարագյոզյանի, դատախազ Պետրոս Պետրոսյանը` ի պատասխան ասվածի՝ սեռական բնույթի հայհոյանքներ է ուղղել Արայիկ Խանդոյանի մոր հասցեին:
«Ընդդեմ իրավական կամայականության» կազմակերպությունը դիմել է ՀՀ գլխավոր դատախազ Ա.Դավթյանին, խնդրելով անհապաղ միջոցներ ձեռնարկել «ակնհայտ հանցագործություն կատարած դատախազի նկատմամբ», հարուցել քրեական գործ եւ ենթարկել նրան պատասխանատվության:
Պաշտպանը խնդրել է սույն հաղորդումը չուղարկել Հատուկ քննչական ծառայություն. «Նրանք են Արայիկ Խանդոյանի նկատմամբ իրականացնում քրեական հետապնդում եւ ՀՔԾ-ն օբյեկտիվ, բազմակողմանի եւ լրիվ քննություն չի կարող իրականացնել»:
Կարդացեք նաև
Ա.Ղարագյոզյանը հղում է կատարել ՀՀ քրեական օրենսգրքի 343 հոդվածի 2-րդ մասին, որը քրեական պատասխանատվություն է նախատեսում դատարանի նկատմամբ անհարգալից վերաբերմունք ցույց տվողի նկատմամբ:
Ռուզան ՄԻՆԱՍՅԱՆ
Հ.Գ.- Նախագահող դատավոր Արշակ Խաչատրյանը մահացել է օրեր առաջ:
