«ՍԱՍ» գրուպի նախընտրական ժողովի՝ մեծ աղմուկ հանած ձայնագրության տարածման հարցում կարծիքներ հնչեցին, թե իբր դրանում Ոստիկանության օպերատիվ ծառայության մատը խառն է: Ես վստահաբար կարող եմ ասել հետևյալը. քանի որ Ոստիկանությունը պետական կառույց է, ուստի բացառվում է նրա մասնակցությունն այս ժողովի ձայնագրման տարածմանը:
Վստահ եմ, որ ՀՔԾ-ն կպարզի իրականությունը և հանրությունը տեղյակ կդառնա ողջ ճշմարտությանը: Սակայն այս ամենում հետաքրքիրն այն է, որ սկսվել է կոմպրոմատների արտահոսք տեղի ունենալ դեպի մամուլ, և պատկերացնո՞ւմ եք, թե ինչ կարող է կատարվել այս պարագայում և այդ ամենի վերջը ինչ է լինելու: Սկզբում տեղի ունեցավ մանկապարտեզների և դպրոցի տնօրենների հեռախոսային խոսակցությունների ձայնագրությունների տարածումը մամուլով, այնուհետև ի հայտ եկան «ՍԱՍ» գրուպի և Չարենցավանի քաղաքապետի նախընտրական ժողովների ձայնագրությունները, հետո մի շարք ռեյտինգային թեկնածուների հայտարարությունները, թե իբր քվեաթերթիկների հաշվման ժամանակ իրենցից ձայներ են գողացել:
Այսպես եթե շարունակվի, ապա չի բացառվում, որ առաջիկայում ավելի լուրջ և ծանրակշիռ ինֆորմացիաներ տարածվի մամուլում, և ինչու չէ, նաև այլ շահագռգիռ անձանց և կառույցների ներգրավեն այդ պղտոր խաղերում, կամ էլ էլեկտրոնային կրիչներ հայտնվեն ինչ-որ կուսակցությունների դռների փալասների տակ:
Կոմպրոմատների արտահոսքը հարկավոր է կանխել, այլապես «ՍԱՍ» գրուպի և աղմուկ հանած մյուս ձայնագրություններին հնարավոր է ավելանան նորերը:
Կարդացեք նաև
Սամվել ՀՈՎՀԱՆՆԻՍՅԱՆ
«Առավոտ». Հիշեցնենք, որ Սամվել Հովհաննիսյանը 2000-2002 թթ. ՀՀ ԱՆ քրեակատարողական վարչության պետն էր, եւ ավելի ուշ մեղադրվեց ՀՀ քրեական օրենսգրքի 38-35-104-րդ հոդվածի 2-րդ մասի 7-րդ և 8-րդ կետերով՝ մի խումբ անձանց կամ կազմակերպված խմբի կողմից և շահադիտական դրդումներով, պատվերով՝ շորթմամբ, ավազակությամբ կամ բանդիտիզմով զուգորդված սպանության նախապատրաստության կազմակերպում, և ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն:
Նա դատապարտվել էր 12 տարվա ազատազրկման եւ պատժի կրումից ազատ արձակվեց 2014 թվականին՝ ՀՀ նախագահ Սերժ Սարգսյանի ներման հրամանագրով:
