Մալաթիա-Սեբաստիա վարչական շրջանի նախկին ղեկավարի որդու՝ Սեդրակ Զատիկյանի սպանության պատվերի գործով այսօրվա դատական նիստը հետաձգվեց: Մեղադրյալ Նարեկ Խաչատրյանի պաշտպան՝ փաստաբան Վարդուհի Էլբակյանը մի շարք հարցումներ է ուղարկել տարբեր մարմինների իր պաշտպանյալի առողջական վիճակի վերաբերյալ, փաստաբանը միջնորդեց հետաձգել նիստը մինչեւ կստանա հարցումների պատասխանները, դատարանը բավարարեց միջնորդությունը:
«Քանի դեռ պատասխանները չեմ ստացել, չեմ հրապարակի դրանց բովանդակությունը»,- մեզ հետ զրույցում ասաց փաստաբանը:
Նրա՝ մեկ այլ միջնորդությունը վերաբերում էր գործով վկա Ահարոն Հակոբյանի ցուցմունքները ապացույցների շարքից հանելուն եւ դրանք անթույլատրելի ճանաչելուն, դատարանը որոշեց այս միջնորդությանն անդրադառնալ խորհրդակցական սենյակում:
Վարդուհի Էլբակյանի խոսքով, դատաքննության ընթացքում իր պաշտպանյալի մեղքն ապացուցող որեւէ նոր ապացույց չի բերվել. «Հին ապացույցներով էլ Նարեկ Խաչատրյանին մեղսագրվող արարքը որեւէ վերաբերելի ապացույցով չի հիմնավորվել, որեւէ ապացույց չի ներկայացվել, որ Նարեկ Խաչատրյանն առնչություն ունի այդ արարքի հետ»: Հիշեցնենք, որ Նարեկ Խաչատրյանն իրեն մեղավոր չի ճանաչում:
Կարդացեք նաև
Հաջորդ դատական նիստը ապրիլի քսանհինգին է:
Արփինե ՍԻՄՈՆՅԱՆ
