Երեւանի քաղաքապետի թեկնածու, «Երկիր Ծիրանի» կուսակցության ղեկավար Զարուհի Փոստանջյանը ավագանու թեկնածուների հետ այսօր «Էրեբունի» պատմահնագիտական արգելոց-թանգարանի մոտ ասուլիս էր հրավիրել: Ըստ Զարուհի Փոստանջյանի, Արարիչը, երբ ստեղծել է երկիրը եւ մասնավորապես դրախտը, հենց այդտեղից է սկսել արարել, դրա համար իրենք առաջին ասուլիսը հենց այդտեղ են որոշել տալ. «Երկիր Ծիրանին ողջ Հայկական բարձրավանդակի անունն է, մեզ այդպես են ճանաչել, պատմությունն այդպես է մատնանշում, մենք ենք Երկիր ծիրանիի զավակները եւ տերերը»:
Նա լրագրողներին տարավ սեպագիր արձանագրությունների մոտ, որտեղ Երեւանի հիմնադրման վերաբերյալ արձանագրությունն է: Նա հիշեցրեց, որ 2799 տարեկան է Երեւանը եւ մենք պետք է ապրենք մեր անցյալին հարիր, արժանապատիվ:
Զարուհի Փոստանջյանն ասուլիսի ժամանակ ասաց. «Մենք, լինելով անդրսահմանային ազգ, պատրաստվում ենք ներգրավել մեր ազգի ողջ ներուժը քաղաքական գործունեության մեջ, ոչ թե միայն բարեգործության կամ այլ նպատակների համար, նրա համար, որ կարողանանք մեր քաղաքական հայտը ներկայացնենք ոչ միայն ՀՀ-ում, այլ նաեւ ՀՀ սահմաններից դուրս»:
Նա ասաց, որ Երեւանի ավագանու ընտրություններին ընդառաջ իրենց առաջին ասուլիսը հենց այդտեղ են անում՝ Էրեբունի բերդի տարածքում, որտեղ թանգարան է, որովհետեւ այստեղ է պահպանվում նաեւ Երեւանի անձնագիրը. «Հենց այդ անձնագրի ներքո, որը այստեղ է տեղադրված, մենք ցանկանում ենք սկսել մեր մեկնարկը քաղաքական սպասելիք միջոցառման համար»:
Կարդացեք նաև
Նա ընթերցեց եւ վերծանեց սեպագիր արձանագրությունը, ըստ որի Արգիշտին՝ Մենուայի որդին այս անառիկ ամրոցը կառուցեց եւ անվանեց այն Էրեբունի: Թանգարանի բարձունքում Զարուհի Փոստանջյանը լրագրողների ուշադրությունը հրավիրեց, թե ինչպիսին է Երեւանը այսօր. «Տեսաք, թե ինչպիսի տարածքներ ունի, կանա՞չ են, արդյոք, մեր տարածքները, նմա՞ն է այն քաղաքին, որը գծագրեց մեզ համար Թամանյանը: Իհարկե, այդպես չէ, ցավալի է, բայց այս 25 տարիների ընթացքում Երեւանի կանաչ տարածքները վերացան եւ Երեւանը վերածվեց միայն շինությունների, մենք չենք կարողանում ապրել էկոլոգիապես մաքուր քաղաքում»:
Զարուհի Փոստանջյանն ասաց, որ իրենց կարգախոսը եւ նախընտրական ծրագիրը կհրապարակեն ամսի 21-ին՝ քարոզարշավի մեկնարկի օրը: Նա ասաց, որ իրենց հիմնական թիրախը այս ընտրություններում ՀՀԿ-ն է. «Մենք գալիս ենք ուղղակի իրենց հեռացնելու այս քաղաքական ասպարեզից, որովհետեւ մենք գտնում ենք, որ նրանք ձախողել են, եւ իրենց երկարաժամկետ պաշտոնավարումն ուղղակի կործանարար է եղել ՀՀ-ի եւ Երեւան քաղաքի համար»:
Հռիփսիմե ՋԵԲԵՋՅԱՆ
