ՀՀ ազգային փոքրամասնություններից պատգամավոր ընտրված չորս ներկայացուցիչներն իշխանությունների հետ քաղաքական խնդիրներ չունեն, դրանք մշակութային են եւ կրթական: Այս մասին այսօր «Հայելի» մամուլի ակումբում հայտարարեց Հայաստանում ասորական համայնքի անդամ, ցեղասպանագետ Անահիտ Խոսրոեւան: Նա նկատեց՝ ինչպես պատգամավոր ընտրված Հայաստանի ասորական համայնքի ղեկավարն է մատնանշում, իրենց հատկացված տարեկան գումարները բավարար չեն, շատ խնդիրներ կան:
«Ասորերենը դասավանդվում է, բայց լեզվի խնդիր կա: Ուսուցիչները քիչ են եւ ոչ բոլորն են, որ տառաճանաչ են: Ասորերենը հեշտ չի, դասագրքեր չկան»,-ասաց Անահիտ Խոսրոեւան: Նա հույս հայտնեց, որ նշյալ խնդիրները կմտնեն նոր խորհրդարանի օրակարգ:
Տիկին Խոսրոեւան նաեւ ասաց՝ ցավում է, որ կարծիք է ձեւավորվել, թե ազգային փոքրամասնություններից ընտրված պատգամավորներն «իշխանությունների ծառան» են լինելու. «Ընտրական օրենսգիրքը բարեփոխումների կարիք ունի: Մի պատգամավորը ոչինչ չի կարող անել, հավանաբար այդ պատճառով էլ նրանք ներկայացնում են իշխող կուսակցությունը: Դա օրինաչափություն է»:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
