«Թե ինչպիսին կլինի 6-րդ գումարման խորհրդարանը՝ ցույց կտա ժամանակը, թե ինչքանով է այն ունակ կամ ներկայացնում ՀՀ քաղաքացու շահերը՝ կերեւա այն ժամանակ, երբ ԱԺ կբերվեն ՀՀ քաղաքացու բարօրությանը, ՀՀ պետական շահերին վերաբերող նախագծեր եւ միջազգային պայմանագրեր, եւ թե ով ինչպես կարձագանքի կամ կքվեարկի դրանց՝ այդ ժամանակ էլ ամեն ինչ հստակ կլինի»,- «Առավոտի» հետ զրույցում ասաց «Ազատ դեմոկրատներ» կուսակցության փոխնախագահ Անժելա Խաչատրյանը` պատասխանելով հարցին` ինչպե՞ս եք վերաբերվում 6-րդ գումարման խորհրդարանում ներկայացված քաղաքական պատկերին. նոր խորհրդարանն ավելի ունա՞կ կլինի, մանավանդ, որ խորհրդարանն այլեւս կառավարման համակարգի կարեւորագույն օղակն է դառնում:
Մեր զրուցակիցը նաեւ հավելեց. «Մի բան ակնհայտ է՝ այս խորհրդարանը չի ներկայացնում ՀՀ քաղաքացիների իրական կամքը եւ տրամադրությունները։ Իսկ այն մեկնաբանությունները, թե սա որակապես այլ խորհրդարան է լինելու, եւ ականատես ենք լինելու գաղափարական պայքարի, ապա թույլ տվեք թերահավատորեն մոտենալ դրան, քանզի խորհրդարանի ճնշող մեծամասնությունն այնտեղ հայտնվել է ոչ գաղափարական եւ ոչ քաղաքական ճանապարհով, ուստի արդեն խորհրդարանում դժվար թե այդ մարդիկ կարողանան քաղաքական օրակարգ եւ ծրագրեր առաջ տանել»։
Կարդացեք նաև
«Առավոտ»
14,04.2017
