Երեկ համացանցում հայտնվեց «ՍԱՍ» գրուպի աշխատակիցների հետ անցկացված նախընտրական ժողովի ձայնագրություններից մեկը, որտեղ ժողովն անցկացնող անձը (ըստ որոշ տեղեկությունների, նա այս ընկերության հիմնադիր Արտակ Սարգսյանի ավագ եղբայրն է՝ Արամ Սարգսյանը), նսեմացնելով աշխատակիցներին, քննարկելով նրանց արտաքին տեսքը՝ մազերի հարդարանքը, դրած «շլյապաները», սպառնալով, շշպռելով, երբեմն էլ Փարիզ ուղևորություն խոստանալով՝ հարկադրում է ձայներ բերել հօգուտ թեկնածուի։
ՀՀ գլխավոր դատախազությունը սկսել է ուսումնասիրել այս ձայնագրությունը։
Aravot.am-ը փաստաբան Երվանդ Վարոսյանից հետաքրքրվեց, թե հանցագործության ի՞նչ հատկանիշներ է պարունակում այս ձայնագրությունը և ՀՀ Քրեական օրենսգրքի ո՞ր հոդվածներով է ենթակա գործ հարուցելու:
Կարդացեք նաև
«Կարծում եմ՝ կատարվածն ամբողջ ծավալով քննելու ու պարզաբանելու կարիք ունի։ Առաջին հայացքից չի բացառվում ՀՀ քրեական օրենսգրքի 149-րդ հոդվածի 2-րդ մասի 1-ին և 5-րդ կետերով նախատեսված առերևույթ արարքի առկայությունը։
Մասնավորապես այդ նորմը պատասխանատվություն է նախատեսում մի խումբ անձանց կողմից՝ գույքային վնաս պատճառելու սպառնալիքով քաղաքացու ընտրական իրավունքի ազատ իրականացմանը խոչընդոտելու համար։ Ձայնագրության որոշ հատվածներ պարունակում են նաև ընտրակաշառքի վերաբերյալ առաջարկներ։ Բացի այդ, ակնհայտ է նաև, որ տեղի է ունեցել նաև աշխատանքային օրենսգրքի նորմերի ու աշխատանքային իրավունքի սկզբունքների ոտնահարում», -ասաց փաստաբանը։
Նունե ԱՐԵՎՇԱՏՅԱՆ
Լուսանկարը՝ Երվանդ Վարոսյանի ֆեյսբուքյան էջից:
