Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանում շարունակվում էր Սարի թաղի գործի քննությունը:
Հիշեցնենք, որ Հարություն Թորոսյանը, Հրայր Իսախանյանը, Անդրանիկ Քյոսեյանը, Էդուարդ Զեյթունյանը մեղադրվում են ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու մեջ:
Անդրանիկ Քյոսեյանը հրաժարվեց իր պաշտպանից, եւ հայտարարեց, որ ցանկանում է, որ իր շահերը պաշտպանի փաստաբան Լիպարիտ Սիմոնյանը, որ պաշտպանում է նաեւ Հարություն Թորոսյանի եւ Էդուարդ Զեյթունյանի շահերը:
Դատական նիստի ընթացքում շարունակվում էր գործով տուժող ոստիկան Իշխան Ավագյանի հարցաքննությունը: Դատավորը հրապարակեց տուժողի նախաքննական ցուցմունքը: Իշխան Ավագյանը նշել էր, որ իրենց մոտեցել են 20-40 տարեկան տղամարդիկ, նրանցից ոմանք գտնվել են ոգելից խմիչքի ազդեցության տակ, ոստիկանները նրանց զգուշացրել են, որ կարող է ոստիկանության ՊՊԾ գնդի տարածքում կրակեն: Ինչից հետո տղամարդիկ սկսել են հայհոյել, եւ նրանց միացել է մոտ 10-15 հոգի, ոստիկանությունը պատնեշ է կազմել, իսկ քաղաքացիները ցանկացել են ճեղքել այն:
Կարդացեք նաև
Նախաքննական ցուցմունքում Իշխան Ավագյանը նշել է, որ քաղաքացիները, տեսնելով, որ ոստիկանական պատը չեն կարողանում ճեղքել, գետնից քարեր են վերցրել՝ նպատակ ունենալով իրենց հարվածել, ոմանք սկսել են ոստիկաններին ձեռքերով և ոտքերով հարվածել և սպառնալ, թե «մորթելու են»:
Իշխան Ավագյանը հայտնել է, որ տեսել է, թե ինչպես են ոստիկան Դավիթ Սահակյանի մեջքին քարով հարվածում, ցանկացել է նրան մոտենալ, սակայն այդ ժամանակ իր ոտքին են քարով հարվածել:
Իշխան Ավագյանը դատարանին հայտնեց, որ իր նախաքննական ցուցմունքը համապատասխանում է իրականությանը, և ասաց, որ այժմ ինքը չի կարողանում մանրամասները հիշել, քանի որ երկար ժամանակ է անցել: Ցուցմունքներում հակասությունները գրավեցին փաստաբանների ուշադրությունը: Փաստաբան Գրիշա Բալասանյանը հայտարարեց, որ տուժողը սուտ ցուցմունք է տալիս, իսկ Լիպարիտ Սիմոնյանը նկատեց, որ տուժողի 3 ցուցմունքներն էլ մեկը մյուսին հակասում է:
Դատական նիստը հետաձգվեց, հաջորդ դատական նիստը տեղի կունենա մայիսի 5-ին:
Ամի ՉԻՉԱԿՅԱՆ
