Ըստ Լեւոն Զուրաբյանի՝ խաղաղության ծրագրից հետո «տանիքների մակարդակի» չեն ուզել իջնել ու մասնակցել Երեւանի ավագանու ընտրություններին
Առաջին նախագահ Լեւոն Տեր-Պետրոսյանը ընտրությունների արդյունքները կամ իր խոսքերով՝ «իշխանությունների սցենարով ապրիլի 2-ին բեմականացված խայտառակ միջոցառումը» բնութագրել էր այսպես. «Երկրում, որտեղ ազգային հարստության առյուծի բաժինը օրինական, թե անօրինական ճանապարհով կուտակված է մի քանի տասնյակ ընտանիքների ձեռքում, իսկ ժողովուրդը՝ դատապարտված կատարյալ թշվառության, ընտրությունների այլ արդյունք ակնկալելը քաղաքագիտական անգրագիտություն կլիներ»:
«Առավոտը» ՀԱԿ խմբակցության ղեկավար Լեւոն Զուրաբյանին հարցրեց՝ մինչեւ ընտրությունները չգիտեի՞ք, որ երկրի հարստությունը կուտակված է մի քանի տասնյակ ընտանիքների ձեռքում, չգիտեի՞ք, որ ժողովուրդն աղքատ է, ուրեմն ինչո՞ւ ՀԱԿ-ը մասնակցեց ընտրություններին, քաղաքագիտական անգրագետ հաշվա՞րկ էր արել: Լեւոն Զուրաբյանը պատասխանեց. «Մենք ունենք սկզբունքներ: Մեր մասնակցությունն ընտրություններին ավելի շատ նման էր ոչ թե պայքարի՝ ինչ-որ տեղերի, մանդատների համար, այլ նախազգուշացման: Մենք օգտագործեցինք քարոզարշավը՝ մեր ժողովրդին, քաղաքական ուժերին, հասարակությանը նախազգուշացնելու նպատակով»:
Մենք ճշտեցինք՝ այսինքն՝ գիտեի՞ք արդյունքը, նա պատասխանեց. «Գիտեք ինչ, միանգամից ասել, թե քանի տոկոս կլինի, ինչ արդյունք կլինի՝ շատ դժվար է, դա գիտի մենակ իշխանությունը, որովհետեւ իշխանությունը շատ լավ վերահսկում է ընտրությունների ընթացքը, ինքը գիտի՝ ինչ է անելու, ոնց է անելու: Բայց մեզ համար իսկապես կարեւոր էր մեր սկզբունքային դիրքորոշումը ներկայացնելը: Եվ ամենակարեւորը՝ մենք ընտրությունները կորցրեցինք, համաձայն եմ, բայց մենք չենք կորցրել մեր սկզբունքները: Այսօրվա Հայաստանում հաջողության հասնելու միջոցը դա է՝ կորցնել սկզբունքները, հաղթել ընտրություններում կամ ստանալ մի քանի մանդատ ընտրություններում: Մենք այդ ճանապարհով երբեք չենք գնացել ու չենք գնա: Մեզ համար ավելի կարեւոր են սկզբունքները, քան մանդատները, իսկ մեր սկզբունքային դիրքորոշումները ներկայացրինք եւ նախազգուշացում արեցինք, բացատրեցինք, թե ինչ վտանգների առաջ է կանգնած Հայաստանը, չանեի՞նք»:
Մեր հարցին՝ Երեւանի ավագանու նախորդ ընտրություններին դուք մասնակցում էիք եւ շատ կարեւորում էիք այդ ընտրությունները, հիմա էլ երկրում նույն իրավիճակն է, ինչո՞ւ չեք մասնակցում այս ընտրություններին, Լեւոն Զուրաբյանը պատասխանեց. «2012-ին լրիվ ուրիշ վիճակ էր, այն ժամանակ ՀԱԿ դաշինքը դոմինանտ ընդդիմադիր ուժ էր, որը 4 տարի շարունակ հարյուր հազարավոր մարդկանց փողոց էր հանում, եւ մենք մեր առջեւ դրել էինք իշխանափոխության նպատակ: Ընդ որում՝ համագործակցելով այլ քաղաքական ուժերի հետ: Այդ ծրագիրը մենք իրականացրել ենք, մենք մտանք պառլամենտ, մենք ստեղծեցինք քառյակը, որ հետո եռյակ դարձավ, այսինքն՝ կար կոնկրետ քաղաքական ծրագիր: Հիմա այս դեպքում մենք ունենք քաղաքական ծրագիր՝ քաղաքականացնելու ԱԺ ընտրությունները: Հանրաքվեում դա ստացվեց, այս դեպքում չստացվեց, բայց դա չի նշանակում, որ մենք չպիտի փորձեինք դա անել: Մենք փորձեցինք՝ չստացվեց, ու հիմա մտածել, որ եթե ԱԺ-ն չստացվեց, 15 օր հետո կստացվի ավագանու ընտրություններում՝ դա աբսուրդ է»:
Կարդացեք նաև
Հարցին՝ ռեսո՞ւրս չունեք մասնակցելու Երեւանի ավագանու ընտրություններին, նա պատասխանեց. «Բարդ էլ կլինի, որ երբ դու առաջարկում ես խաղաղության ծրագիր, արմատական ծրագիր, մեկ րոպեում փոխվել եւ սկսել խոսել տանիքների, այլ բաների մասին: Եթե մեր ծրագիրը չի իրականացվում, իջնել տանիքների մակարդակի… ոչ թե իջնել, այլ տանիքների մակարդակի համար պետք է բարձրանալ, խոսքը ուրիշ բանի մասին է՝ սկսել խոսել այն պրոբլեմների կույտի մասին, որն ընդհանուր կոնցեպցիայի մեջ չի տեղավորվում՝ դա անիմաստ կլիներ: Երկու բան պիտի լիներ՝ կամ մենք պիտի տեսնեինք ծրագրային լուծումներ, որը մենք այս պահին չենք տեսնում, որովհետեւ գլխավոր ծրագիրը չի իրականացվում, կամ պետք է լիներ հաղթանակի հնարավորություն, որի դրոշով մենք գնայինք առաջ: Հիմա այս ԱԺ-ի ընտրություններից հետո հաստատ նման հիմքեր չկան մտածելու, որ կարելի էր քաղաքական հաղթանակ ունենալ»:
ՀՌԻՓՍԻՄԵ ՋԵԲԵՋՅԱՆ
«Առավոտ»
12,04.2017
