Միլիարդատեր Ալիշեր Ուսմանովը դատի է տվել ռուս ընդդիմադիր գործիչ Ալեքսեյ Նավալնիին և նրա «Կոռուպցիայի դեմ պայքարի հիմնադրամ»-ին: Ուսմանովի հայցը գրանցվել է: «Խոսքը պատվի և արժանապատվության պաշտպանության հայցի մասին է»,-ասել է դատարանի մամուլի քարտուղար Լյուդմիլա Մորոզովան:
Հիմնադրամում հայտարարել են, որ «ուրախ կլինեն» միլիարդատիրոջ փաստաբանների հետ հանդիպել դատարանում:
Ուսմանովը նման որոշում է կայացրել Նավալնիի հիմնադրամի կողմից հրապարակումների կապակցությամբ, որոնք վերաբերում են ՌԴ վարչապետ Դմիտրի Մեդվեդևի բարեգործական և ոչ կոմերցիոն հիմնադրամներին:
Հրապարակման համաձայն՝ Մեդվեդևի համակուրսեցի Իլյա Ելիսեևը և նրա հետ կապված հիմնադրամը Ուսմանովից ստացել է 5 միլիարդ ռուբլի արժողությամբ հողատարածք՝ առանձնատնով, որը գտնվում է Ռուբլյովկայի վրա: Գործարարը հերքել է բոլոր մեղադրանքները՝ հայտարարելով, որ կալվածքը փոխանակել է մեկ այլ առանձնատան հետ: Ուսմանովին պատկանող USM Holdings-ի մամուլի ծառայությունը Նավալնիի և նրա հիմնադրամի եզրահանգումները համարել են «ոչ կոմպետենտ»:
