Ապրիլի 12-ին «Հայացք» մամուլի ակումբում Ավագ շաբաթվա և Հարության տոնի մասին խոսեցին Եռաբլուրի Ս. Նահատակաց եկեղեցու և Արաբկիր համայնքի հոգևոր հովիվ Տեր Բաբկեն քահանա Հայրապետյանը և ազգագրագետ Խորեն Գրիգորյանը:
«Ավարտվում է Մեծ Պահքի շրջանը և այն մարդիկ, որոնք պահք չեն պահել՝ պարտավոր են Ավագ հինգշաբթի օրը մասնակցել պատարագի և ապաշխարել»,- ասաց Տեր Բաբկեն քահանա Հայրապետյանը :
Հարության տոնից մեկ օր առաջ, բոլոր եկեղեցիներում կմատուցվի ճրագալույսի պատարագ: Իսկ Զատկին հաջորդող երկուշաբթի օրը կհամարվի մեռելոց:
«Անգամ այն տներում, որտեղ տարվա մեջ մահ է եղել՝ կարմիր ձվի ներկվելը պարտադիր է, քանի որ Հիսուսի արյան գույնով վերջ է տրվում տխրությանը և ավետվում ՝ նոր կյանքի սկիզբ»,-նշեց քահանան:
Կարդացեք նաև
«Զատկից ոչ պակաս կարևոր է նաև տնօրհներքի արարողությունը, որը կատարվում է Մեռելոցին հաջորդող օրը»,- հավելեց ազգագրագետ Խորեն Գրիգորյանը :
Երկրին ու ողջ մարդկությանը խաղաղություն մաղթելով՝ քահանան ասաց. «Քրիստոս հարյավ ի մեռելոց , օրհնյալ է հարությունը Քրիստոսի» :
Նունե ԱՍԼԱՆՅԱՆ
