«Այստեղ ոչ մի քրեական արարք չկա»,- ապրիլի 12-ին «Մեդիա կենտրոնում» լրագրողների հետ հանդիպման ընթացքում ասաց Հայաստանի հելսինկյան կոմիտեի ղեկավար Ավետիք Իշխանյանը:
Հիշեցնենք՝ «Իրազեկ քաղաքացիների» միավորում հասարակական կազմակերպությունը հրապարակել էր դպրոցի տնօրենների ձայնագրություններ, որտեղ տնօրենները խոստովանում էին, որ իշխող Հանրապետական կուսակցության համար ցուցակներ են հավաքում: 30 դպրոցի տնօրեններ այնուհետև դիմել են դատարան՝ Դանիել Իոաննիսյանից պահանջելով ներողություն խնդրել և որպես փոխհատուցում՝ յուրաքանչյուրին վճարել 2 միլիոն դրամ:
Ավետիք Իշխանյանը նշեց, որ քաղաքակիրթ երկրներում, նման բացահայտումների դեպքում, լինում է սկանդալ, հրաժարականներ. «Հանձնարարական կատարողները վստահաբար իմացել են, որ իրենք չեն պատժվելու: Ես վստահ էի, որ Դանիելի նկատմամբ ինչ-որ գործողություններ կատարվելու են՝ ընտրություններից հետո, իհարկե՛: Եվ դրա պատճառներից մեկն այն էր, որ բոլոր քաղաքական ուժերը, բացի Հանրապետականից, պետք է օգտագործեին այդ բացահայտումները՝ ընդհուպ մինչև ուլտիմատում. եթե այս հարցը չի բացահայտվում, իրենք չեն մասնակցում ընտրություններին:
Եվ սա ցույց տվեց, որ մեր քաղաքական հիմնական ուժերը նույն վիճակում են գտնվում, ինչ ուսուցիչները: Ուսուցիչներին երկրորդ անգամ նվաստացնում են՝ բերելով դատարան: Իրականում, եթե այդ ուսուցիչների արժանապատվությունը վիրավորվել է, նրանք պետք է դատի տային քաղաքապետարանի, շտաբների, մարզպետարանի համապատասխան աշխատակիցներին, որոնք դրել են իրենց այդ իրավիճակի մեջ և խայտառակել են»:
Կարդացեք նաև
Ամի ՉԻՉԱԿՅԱՆ
Լուսանկարը՝ «Մեդիա» կենտրոնի
