Թուրքագետ Ռուբեն Սաֆրաստյանը կարծում է, որ Արցախյան հակամարտության կարգավորման բանակցային գործընթացում առաջիկայում կտրուկ փոփոխություններ չեն լինի, քանի որ գերտերությունների ուշադրությունը Սիրիական հակամարտության վրա է: Այս մասին նա այսօր ասաց «Փաստարկ» մամուլի ակումբում:
Լրագրողները հետաքրքրվեցին՝ արդյո՞ք Սիրիայում Թուրքիայի ակտիվությունն Ադրբեջանին չի հրահրի նոր սադրանքների: «Ադրբեջանի ագրեսիան մեր տարածաշրջանում մեծապես պայմանավորված է Թուրքիայով, սակայն վերջինս կշարունակի ավելի խորանալ սիրիական գործերում. Սիրիայում քրդական ինքնավարության ստեղծումն ընթացքի մեջ է…Այս համատեքստում չեմ սպասում, որ Թուրքիան շահագրգռված կլինի Հարավային Կովկասում ագրեսիվացնել Ադրբեջանին: Ադրբեջանն ինքը կորոշի իր ագրեսիվության աստիճանը»,-նկատեց Ռուբեն Սաֆրաստյանը:
Թուրքագետն անդրադարձավ նաեւ ռուսաստանցի լրագրող Վլադիմիր Սոլովյովի՝ Ալիեւի հետ հանդիպմանն արված հայտարարությանը, թե «Բաքվում լավ են հասկանում, որ ՌԴ-ն թույլ չի տա Արցախի հարցի ռազմական լուծում»:
Կարդացեք նաև
«Նրա ասածում նոր քաղաքական ուղերձ ու գաղափար չկար, դա ռուսական քաղաքականության արտահայտությունն էր»,-ասաց Ռուբեն Սաֆրաստյանը: Բանախոսը կարծիք հայտնեց նաեւ այն մասին, թե արդյո՞ք ապրիլի 24-ին ընդառաջ պետք է ինչ-որ հայտարարություն սպասել ԱՄՆ նախագահից՝ Հայոց ցեղասպանության առնչությամբ. «Թրամփը երբեւէ ոչ մի արտահայտություն չի արել հայկական խնդիրների առնչությամբ եւ դժվար թե դրանք գնահատվեն որպես ամերիկյան շահերի արտահայտչամիջոցներ»:
Լուիզա ՍՈՒՔԻԱՍՅԱՆ
