«ԱՄՆ պետքարտուղարը վերջնագիր է ներկայացնում ՌԴ-ին՝ կամ վերջինս կընդունի իրենց պայմանները, կամ կհայտնվի մեկուսացման մեջ: Սա մարտահրավեր է ռուսական դիվանագիտության համար»,-«Փաստարկ» մամուլի ակումբում այսօր անդրադառնալով ԱՄՆ պետքարտուղար Ռեքս Թիլերսոնի եւ ՌԴ արտգործնախարար Սերգեյ Լավրովի՝ այսօր Սիրիայի հարցով ընթանալիք բանակցություններին, ասաց թուրքագետ Ռուբեն Սաֆրաստյանը:
Նրա բնորոշմամբ՝ ռուսները պետք է փորձեն հարմարվել ԱՄՆ առաջարկներին կամ հակազդել. «Չեմ կարծում, որ ՌԴ-ն պատրաստ է ԱՄՆ-ի հետ գնալ սուր հակազդեցության: Թրամփին հաջողվեց ՌԴ-ի դեմ միասնական ճակատ ստեղծել Սիրիայի հարցում»:
Կարդացեք նաև
Թուրքագետի խոսքով՝ ԱՄՆ սրում է իրադրությունը Սիրիայում. «Շատ բան կախված կլինի նրանից, թե արդոք Իրանն ու ՌԴ-ն կգնա՞ն ԱՄՆ-ի հետ հարաբերությունների սրմանը»:
Հիշեցնենք, որ Սիրիայում ռուս-ամերիկյան առճակատումն առաջացել էր վերջերս ԱՄՆ-ի կողմից սիրիական կառավարական ավիաբազային օդային հարվածներ հասցնելու հետեւանքով. ԱՄՆ-ն Ասադի ուժերին եւ վերջինիս դաշնակիցներին է մեղադրում՝ դրանից առաջ Իդլիբում քիմիական զենք կիրառելու մեջ:
Ռուբեն Սաֆրաստյանը նաեւ նշեց, որ օգտվելով ռուս-ամերիկյան առճակատումից՝ հնարավոր է՝ Թուրքիան փորձի իր դիրքերը Սիրիայում ուժեղացնել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
