Չնայած ղարաբաղյան հակամարտության զորքերի շփման գծում լարվածության աճին և բանակցային գործընթացի սահմանափակ առաջընթացին, ԵԱՀԿ-ն շարունակում է ջանքեր գործադրել հակամարտության խաղաղ և տևական լուծման համար: Այս մասին նշվում է ԵԱՀԿ գործունեության 2016թ. զեկույցում, որտեղ ամփոփվել են կազմակերպության գործունեության և իրականացրած ծրագրերի արդյունքները:
Զեկույցի համաձայն՝ անցած տարի հակամարտությունները եղել են ԵԱՀԿ-ի օրակարգի գլխավոր թեման և ղարաբաղյան հակամարտության գոտում բռնության հաճախակի դարձած դեպքերը անխուսափելի են դարձրել ճգնաժամի կառավարումը:
Հաշվետվությունում նշվում է, որ ԵԱՀԿ-ում նախագահության շրջանակներում Գերմանիան զգալի ջանքեր է գործադրել բանակցային ձևաչափերն ամրապնդելու, հակամարտություններից տուժած մարդկանց կենսապայմանները բարելավելու համար:
«Գերմանիան անհապաղ արձագանքել է ղարաբաղյան հակամարտության գոտում լարվածության էսկալացիային, նախաձեռնել է Մշտական խորհրդի նիստի անցկացում, կոչ է արել կյանքի կոչել Վիեննայի և Սանկտ Պետերբուրգի համաձայնագրերը, ընդլայնել ԵԱՀԿ գործող նախագահի անձնական ներկայացուցչի գրասենյակը և ստեղծել պատահարների հետաքննության մեխանիզմ: Գերմանիան կոչ է արել վերսկսել հակամարտության խաղաղ կարգավորմանն ուղղված բանակցային գործընթացը»,-ասվում է զեկույցում:
Կարդացեք նաև
Հաշվետվությունում նաև նշվում է, որ ապրիլյան մարտերից հետո ԵԱՀԿ գործող նախագահի անձնական ներկայացուցիչը 8-օրյա այցով գտնվել է տարածաշրջանում, հանդիպել հակամարտող կողմերի բարձրաստիճան ներկայացուցիչների հետ:
Նշվում է նաև, որ 2016թ. ընթացքում Հայաստանը և Ադրբեջանը ԵԱՀԿ-ին 45 հազար 408 եվրոյի ֆինանսական աջակցություն են տրամադրել: 2016թ. ընթացքում ԵԱՀԿ-ն 22 անգամ մշտադիտարկում է իրականացրել, որից 5-ը՝ հայ-ադրբեջանական սահմանում, իսկ 17-ը՝ Արցախի և Ադրբեջանի հակամարտ զորքերի շփման գծում:
