Ռուսաստանի իշխանությունները մասնակից են Սիրիայի Իդլիբ նահանգում քիմիական հարձակման հետևանքները թաքցնելու մեջ: Այս մասին ասվում է Սպիտակ տան գաղտնազերծված զեկույցում:
Ամերիկյան հետախուզության տվյալներով՝ Սիրիայի կառավարական բանակը զարին պարունակող ռումբեր է նետել հայրենակիցների վրա: Սպիտակ տունը կարծում է, որ Ռուսաստանը և Սիրիան փորձել են համաշխարհային հանրությանը մոլորության մեջ գցել ապատեղեկատվական արշավի միջոցով: Մոսկվան բազմաթիվ իրար հակասող հայտարարություններ է անում, որպեսզի շփոթեցնի միջազգային հանրությանը՝ ասվում է զեկույցում:
Զեկույցը չի մանրամասնում՝ արդյոք Ռուսաստանը նախօրոք գիտեր Իդլիբի նահանգում քիմիական հարձակման մասին:
Զեկույցի մի մասը նվիրված է Ռուսաստանի տվյալների հերքմանն այն մասին, որ Իդլիբում ինքնաթիռները ռմբակոծել են զինամթերքի պահեստները, որոնք պատկանում են «ահաբեկիչներին»: Փաստաթուղթը պարունակում է տեսանյութերի հղումներ և արբանյակից արված լուսանկարներ, որոնցում երևում է, որ ռումբերը նետվել են ճանապարհի, այլ ոչ թե շինության վրա:
Կարդացեք նաև
Հիշեցնենք, որ Իդլիբ նահանգի Խան Շեյխուն քաղաքը ավիահարվածի է ենթարկվել ապրիլի սկզբին: Հարձակման հետևանքով զոհվել է շուրջ 90 մարդ: Տեսաձայնագրություններում երևում է, որ մարդկանց մոտ ավիահարձակումից հետո ի հայտ են եկել քիմիական թունավորման ախտանիշներ: Սիրիան հերքում է քիմիական զենքի կիրառումը:
